Kapiten Ymërdin Hasani, pjesëtar i Forcës së Sigurisë së Kosovës, ka diplomuar me sukses në Kursin e Çështjeve Civile në Fort Bragg, Karolina e Veriut, në Qendrën dhe Shkollën e Luftës Speciale “John F. Kennedy”, njofton Kosova Post.
Gjatë këtij trajnimi prestigjioz, Kapiten Hasani është vlerësuar me Medaljen për Arritje Ushtarake, një çmim që u jepet pjesëtarëve që arrijnë rezultate të larta gjatë programit arsimor.
Ky kurs i specializuar trajton përgatitjen e oficerëve për bashkëpunim me komunitete lokale, vlerësimin e nevojave civile dhe koordinimin e projekteve që mbështesin stabilitetin dhe zhvillimin në zona operimesh. Përmes tij, Kapiten Hasani ka fituar njohuri të avancuara në menaxhimin e situatave civile, bashkërendimin me institucione vendore dhe organizata partnere, si dhe në krijimin e lidhjeve mes forcave ushtarake dhe popullsisë civile.
Sipas FSK-së, njohuritë e fituara nga Kapiten Hasani do të kontribuojnë drejtpërdrejt në forcimin e kapaciteteve të Çështjeve Civile brenda Forcës së Sigurisë së Kosovës.
