Sonte në kryeqytet mbahet nata përmbyllëse e festivalit “Okarina Fest”. Ky festival ka lindur me qëllimin e veçantë për të promovuar kulturën dhe trashëgiminë historike përmes një instrumenti të rrallë dhe të lashtë, Okarinën e Runikut.
Në emisionin “Mirëmëngjesi Kosovë” në RTK, ishte e ftuar Kristina Palokaj Përkola organizatore e këtij festivali, e cila dha detaje rreth këtij festivali.
“Historikisht, kur flasim për festivale, dimë se ato kanë për qëllim promovimin e kulturave, në bashkëpunimin me individë që i përkasin kësaj fushe. Me këtë frymë, menduam të bëjmë diçka të veçantë me instrumentin tonë të lashtë, Okarinën e Runikut. Ideja për këtë festival lindi natyrshëm”, tha Palokaj Përkola.
Okarina e Runikut, një instrument muzikor i zbuluar në Runik të Skenderajt, daton rreth 7,000 vite më parë dhe është i vetmi i këtij lloji në Ballkan. Ky instrument fitoi popullaritet edhe falë mjeshtrit Shaqir Hoti, i cili për vite promovoi vlerat e këtij instrumenti.
Sidoqoftë, historia e Okarinës ka pasur një kthesë dramatike. Në vitin 1989, ky artefakt u dërgua në Beograd për disa ekspozita, por fatkeqësisht nuk u kthye më kurrë.
“Ky ka qenë një peng i madh për Shaqir Hotin, pasi nuk pati më mundësi të luante asnjëherë në të”, shtoi Palokaj Përkola.
