Presidentja e Kosovës, Vjosa Osmani, pas konferencës me sekretarin e jashtëm britanik, David Lammy ka thënë se nuk do të përzihet në çështje koalicionesh, pavarësisht se në të kaluarën mund të ketë pasur presidentë që e kanë bërë këtë gjë.
“Si presidente nuk kam të drejtë vote pavarësisht se në të kaluarën mund të ketë pasur president që janë përzier në çështjen e koalicioneve. Unë i konsideroj ato çështje partiake që sipas Kushtetutës nuk janë detyrë e imja. Por, jam besimplote që institucionet përkatëse, në këtë rast deputetët e Kuvendit të Kosovës do të bëjnë çmos që kjo të jetë seancë e suksesshme”, ka thënë Osmani.
Presidentja Osmani tha se është me rëndësi që brenda afateve kushtetuese Kosova ta ketë qeverinë e saj dhe konstituimin e Kuvendit.
“Ju po i shihni zhvillimet politike dhe nuk është që globi na pret neve.Është me rëndësi për qytetarët e Kosovës që sa më parë që të jetë e mundur dhe brenda afateve kushtetuese ta kemi qeverinë e Republikës së Kosovës. Së pari konstituimin e Kuvendit të Kosovës që është hap i parë, pastaj edhe qeverinë e Kosovës. Një Kuvend funksional që kryen edhe punën e mbikëqyrjes në raport me qeverinë sepse Kosova ka shumë punë për të bërë”, ka thënë Osmani.
