Presidentja e vendit, Vjosa Osmani ka deklaruar se institucionet e sigurisë janë duke bërë punën e vazhdueshme që në komunat veriore të ketë siguri, sa i përket zgjedhjeve që do të mbahen me 23 prill.
Osmani ka thënë se të gjitha vlerësimet nga institucionet relevante janë që zgjedhjet të mbahen ashtu siç janë caktuar.
“Sa i përket zgjedhjeve ato janë caktuar për datën 23 prill në bashkëpunim me të gjitha subjektet politike në vend dhe ato që kanë qenë të regjistruara për zgjedhjet që do të mbahen në katër komunat e veriut. Institucionet e sigurisë janë duke bërë përpjekjet dhe punën e vazhdueshme që në mënyrë që në të gjitha këto katër komuna të ketë siguri. Deri tani nuk kam asnjë letër, asnjë vlerësim apo informatë që do të më qonte deri te drejtimi i kundër, që të mendohet diçka ndryshe. Të gjitha vlerësimet nga institucionet relevante janë që zgjedhjet të mbahen ashtu siç janë caktuar”, tha ajo.
Sipas saj, deri më tani nuk ka marrë ndonjë dokument nga Këshilli gjyqësor për dorëheqje të zyrtarëve serb apo zyrtarëve të tjerë që punojnë në institucionet e drejtësisë.
“Deri tani nuk kam marrë ndonjë dokument nga këshilli gjyqësor për dorëheqje të zyrtarëve serb, apo zyrtarëve tjerë që punojnë në institucionet e drejtësisë. Kam marr propozime të shumta për gjyqtar shqiptar që kanë dalë në pension që t’i lirojë nga detyra, mirëpo për gjyqtar serb deri tani nuk ka ardhur ndonjë”, përfundoi Osmani.
