Gjatë orëve të hershme të mëngjesit të së Premtes pritet depërtimi i frontit të fuqishëm të ftohtë ajror nga veriu. Fillimisht do të ketë reshje shiu dhe shumë shpejtë edhe reshje bore sidomos në viset kodrinore-malore, por edhe në disa ultësira.
Pasdite reshjet pushojnë për të rifilluar sërish të shtunën kur mund të kemi episode reshjesh të dendura bore në shumë pjesë të Republikës së Kosovës. Temperaturat nga 0 deri në 5 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi të Premten parashihet të mbajë mot plotësisht i vranët dhe me reshje shiu. Në viset kodrinore-malore reshje bore. Reshje bore priten edhe në ultësira në veri të Malit të Zi dhe disa vise në Luginë të Preshevës dhe mund të ketë edhe në disa ultësira të Maqedonisë së Veriut si dhe normalisht në lindje, juglindje, verilindje dhe veri të Shqipërisë. Në viset tjera reshje të herëpashershme shiu.
E Shtuna plotësisht e vranët në Kosovë me reshje bore të cilat nganjëherë mund të jenë të dendura dhe të krijojnë shtresa edhe në zona urbane të Rrafshit të Kosovës, duke mos përjashtuar tërësisht mundësinë edhe për Dukagjin ku më shumë priten reshje shiu. Megjithatë bora nganjëherë mund të kalojë në shi në ultësira. Në viset kodrinore-malore do krijohen shtresa të mëdha bore. Reshjet më të dendura të borës priten në viset kodrinore-malore të Maqedonisë së Veriut dhe shumë viseve kodrinore-malore të Kosovës dhe pjesës lindore të Shqipërisë.
Edhe e diela plotësisht e vranët dhe me reshje bore në viset kodrinore-malore, ndërsa në disa nga zonat e ulëta bora pritet të kalojë në shi dhe kjo do të varet nga temperaturat të cilat pritet të rriten pak a shumë.
