Presidenti francez Emmanuel Macron dhe presidenti i zgjedhur i SHBA-së, Donald Trump do të takohen sot pasdite për bisedime dypalëshe në kuadër të festimeve që shënojnë rihapjen e katedrales Notre Dame në Paris.
”Takimi është planifikuar në rezidencën zyrtare presidenciale”, tha zyra e shtypit e Macron dhe ambasada franceze në Uashington.
Macron gjithashtu do të presë edhe presidentin ukrainas, Volodymyr Zelensky.
Vizita e Trump në Francë është udhëtimi i tij i parë jashtë vendit që nga fitorja e zgjedhjeve presidenciale në fillim të nëntorit.
Me ftesë të Macron, lideri republikan do të marrë pjesë në rihapjen ceremoniale të katedrales Notre Dame, sot në mbrëmje.
Katedralja gotike me famë botërore u dëmtua rëndë në një zjarr në vitin 2019 dhe iu nënshtrua restaurimit të madh.
Nuk dihet ende nëse Trump do ta përdorë gjithashtu vizitën në Paris për të zhvilluar bisedime politike me liderë të tjerë që pritet të mbërrijnë për rihapjen e katedrales.atsh.
