Harku i Triumfit dhe më pas zbritja drejt Champs Elysées me eskortën e Gardës së Republikës.
Parisi është tashmë gati – dhe kryesisht i bllokuar nga trafiku – për vizitën shtetërore të presidentit amerikan, Joe Biden të planifikuar për sot, e para e presidentit amerikan në Francë.
Kryeqyteti është gjysmë i paralizuar, trafiku është pothuajse inekzistent duke pasur parasysh mbylljen e rrugëve dhe akseseve të shumta, përfshirë gjysmën e periferisë apo unazën pariziane.
Pas ceremonisë në varrin e Ushtarit të Panjohur në Harkun e Triumfit në orën 12:30, dy krerët e shteteve do të zbresin përgjatë rrugës së famshme të zbukuruar me ngjyrat e dy vendeve, të paraprirë dhe të ndjekur nga 140 roja me kuaj dhe 38 me motoçikleta.
Biden, 81 vjeç, pasi mbërriti në Francë të mërkurën me zonjën e parë Jill dhe kishte marrë pjesë në ngjarje të ndryshme në përkujtim të zbarkimit të Normandisë, kthehet në Paris për këtë vizitë, e cila nuk do të festojë vetëm miqësinë franko-amerikane.
Në krah të tij do të jetë edhe bashkëshortja e sapo kthyer nga Shtetet e Bashkuara të Amerikës, ku shkoi dje për të marrë pjesë në gjyqin e djalit të presidentit, Hunter.
Gjithashtu sot, në bisedimet me Macron, do të jetë tema mbizotëruese e ndihmës për Ukrainën dhe “koordinimi i ngushtë për krizat ndërkombëtare dhe përgatitja e afateve të ardhshme ndërkombëtare, njoftoi Elysée, në veçanti samiti i G7 në Itali në qershor dhe ai i NATO-s në Uashington në korrik.
Ndër temat në tryezën e Macron dhe Biden, është “forcimi i bashkëpunimit dypalësh, veçanërisht në çështjet ekonomike, hapësinore dhe bërthamore” dhe “çështjet globale” si “emergjenca klimatike dhe mbrojtja e biodiversitetit”.
Dreka e punës e Biden dhe Macron në Elysee është planifikuar për në orën 13:10.
Në orën 16:00 konferencë për shtyp, më pas “Këshilli i biznesit franko-amerikan”.
Sonte, përfundimi do të jetë me një darkë shtetërore në Elysee, shkruan atsh.
Për Bidenin do të ketë edhe një vizitë private nesër, kur do të shkojë të vendosë kurorë lulesh në varrezat amerikane ”Bois Belleau”, pranë Parisit, në homazh për ushtarët e rënë në Luftën e Parë Botërore.
