“Donald Trump është një fashist.” Kështu është shprehur zv/presidentja e SHBA, njëherësh rivalja e tij për zgjedhjet e nëntorit, Kamala Harris, pasi shefi i saj më i lartë i kabinetit tha se ish-presidenti lavdëroi Adolf Hitlerin ndërsa ishte në detyrë dhe vuri besnikërinë personale mbi Kushtetutën.
“Unë jam e bindur se Trump është një fashist”, përsëriti demokratja në takimin me votuesit në Pensilvani.
“Dhe nuk jam vetëm unë që mendoj kështu, por edhe njerëzit që punuan me të. Trump nuk do ta mbrojë Kushtetutën amerikane, ai do ta vrasë atë”, tha zv/Presidentja amerikane, duke cituar John Kelly.
Më tej Harris këmbënguli se republikani “është një rrezik” për Shtetet e Bashkuara.
“Ai është gati të hartojë një listë të armiqve të tij për t’u hakmarrë. Ai do të sulmojë kundërshtarët apo gazetarët. Ai tha se është gati të përdorë ushtrinë kundër armikut të brendshëm. Unë përfaqësoj një brez të ri liderësh, një qasje të re që bazohet në përvoja të ndryshme”, deklaroi ajo.
Sakaq, Donald Trump iu përgjigj ish-gjeneralit të marinës John Kelly, shefit të stafit të Shtëpisë së Bardhë midis 2017 dhe 2019, duke thënë në Truth Social se Kelly “krijoi një histori” dhe vazhdoi të ofendonte ish-shefin e tij të kabinetit, duke deklaruar se “rezistenca e Kelly është kthyer në dobësi”.
Trump dhe citati për Hitlerin
Toni në fushatën zgjedhore në SHBA u ndez pasi u shfaqën komentet e Donald Trump të raportuara nga gjenerali John Kelly në deklaratat për Neë York Times dhe gazeta të tjera amerikane. Oficeri, i njohur për rolin e tij si shef i shtabit gjatë Presidencës Trump, tha se ish-presidenti fliste me tone lavdëruese në lidhje me gjeneralët nazistë të Adolf Hitlerit.
Kelly, një gjeneral i marinës amerikane në pension shtoi se Trump teknikisht i përshtatet përkufizimit të “fashistit” dhe për këtë konkluzion iu referua viteve të tij të punës pranë ish-Presidentit.
“Duke parë përkufizimin e fashizmit: është një ideologji dhe lëvizje politike e ekstremit të djathtë, ultranacionaliste, autoritare e karakterizuar nga një lider diktatorial, autokraci e centralizuar, militarizëm, shtypje e detyruar e opozitës, besim në një hierarki natyrore shoqërore”, tha Kelly, duke shtuar se “këto janë llojet e gjërave që Trump mendon se do të funksiononin më mirë për të qeverisur Amerikën”.
The Atlantic raportoi dje se Trump i kishte thënë Kellyt ekzaktësisht kështu: “Kam nevojë për gjeneralët që kishte Hitleri. Njerëz që ishin plotësisht besnikë ndaj tij, që ndiqnin urdhrat.”
Donald Trump iu përgjigj ish-gjeneralit në Truth Social. “Historia e ushtarëve ishte një gënjeshtër, siç ishin shumë histori të tjera që ai tregoi. John Kelly është një djalë i keq dhe një gjeneral i tmerrshëm, mendimin e të cilit nuk e kërkova më nga Shtëpia e Bardhë dhe i thashë të largohej”, shkroi Trump para një mitingu në Xhorxhia. (A2 Televizion)
