Kreu shpirtëror i të krishterëve ortodoksë të botës tha të mërkurën se Kisha e fuqishme Ortodokse e Rusisë ndante përgjegjësinë për konfliktin në Ukrainë, por se ai ishte i gatshëm të ndihmonte në “rigjenerimin shpirtëror” të Rusisë pas luftës.
Komentet e Patriarkut Ekumenik Bartolomeu janë një qortim për Patriarkun rus Kirill, bekimi i plotë i të cilit për pushtimin e Ukrainës nga Moska e ka copëtuar kishën ortodokse mbarëbotërore.
Bartolomeu, i cili në vitin 2019 zemëroi Moskën duke njohur Kishën Ortodokse të sapokrijuar të Ukrainës, tha se autoritetet ruse po përdorin Kishën si një “instrument për objektivat e tyre strategjikë”.
“Kisha dhe udhëheqja shtetërore në Rusi bashkëpunuan në krimin e agresionit dhe ndanë përgjegjësinë për krimet që rezultuan, si rrëmbimi tronditës i fëmijëve ukrainas,” tha ai në një konferencë të mbajtur në parlamentin e Lituanisë.
Javën e kaluar, Gjykata Penale Ndërkombëtare lëshoi një urdhër arresti për presidentin rus Vladimir Putin, duke e akuzuar atë për krimin e luftës të dëbimit të paligjshëm të qindra fëmijëve nga Ukraina. Rusia thotë se fëmijët u zhvendosën nga Ukraina për sigurinë e tyre. Ajo mohon kryerjen e shkeljeve të të drejtave në Ukrainë.
“Dialogu ynë ndërfetar duhet të fokusohet në mënyrat për të rezistuar dhe neutralizuar kapacitetin e udhëheqjes së Patriarkanës së Moskës për të minuar unitetin dhe për të legjitimuar teologjikisht sjelljen kriminale,” tha Bartolomeu.
Kisha Ortodokse Ruse nuk kishte asnjë koment të menjëhershëm.
