Instituti i Pyjeve në Pejë ka avancuar hulumtimet shkencore me teknologjinë e fundit.
Kështu ka bërë të ditur ministri i Bujqësisë, Faton Peci, i cili dhe ka vizituar këtë institut, transmeton Klankosova.tv.
Sipas Pecit, laboratori është i pajisur me pajisje të specializuara, duke përfshirë mikroskopë kabinete me sistem filtrimi, autoklava, destilatorë, inkubatorë, matës të lagështisë dhe temperaturës, centrifuga dhe pajisje të tjera të specializuara për analizë të thelluar.
“Instituti ka një rol të rëndësishëm në monitorimin e shëndetit të pyjeve në Kosovë, duke realizuar hulumtimin, trajtimin e sëmundjeve pyjore, si dhe në prodhimin e fidanëve. Një pjesë e rëndësishme e Institutit të Pyjeve është edhe fidanishtja pyjore, e vendosur në Orrobërd me një sipërfaqe prej 10 hektarësh, ku kultivohen fidane të llojeve të ndryshme, të cilat përdoren për pyllëzime masive në mbarë vendin”, ka shkruar ministri në Facebook.
“Me përkushtimin për të rigjeneruar pyjet dhe për të mbrojtur biodiversitetin e llojeve autoktone fidanishtja pyjore e Orrobërdes është një aset për menaxhimin e qëndrueshëm të pyjeve tona që ndikon direkt në përmirësimin e mjedisit natyror të Kosovës”.
