Teksa në kampin e Real po festohet për arritjen në çerekfinale të Ligës së Kampionëve pas ndeshjes dramatike ndaj Atletico-s në derbin e Madridit, tek Colchoneros janë të tërbuar.
Në konferencën pas ndeshjes, trajneri Diego Simeone shpërtheu mbi penalltinë e anuluar të Julian Alvarez që ishte vendimtare.
“Nuk kam parë kurrë që VAR të thërrasë një arbitër për një situatë si ajo sonte”, tha Cholo mes nervash.
“Unë u them të gjithëve këtu: ‘Ngrini dorën nëse e keni parë që Julian preku topin dy herë në penallti’. Hajde! Askush nuk e ngre dorën. Le të kalojmë në një pyetje tjetër. Më pas për ndeshjen: ‘Nuk do të flisja gjithsesi për fat të keq, jam krenar për ekipin tim’”.
Ndërkohë edhe tekniku i Los Blancos, Carlo Ancelotti e komentoi episodin “Alvarez”.
“Është një short, ai bën dy prekje sepse gjuan me këmbën e djathtë dhe gjithashtu e merr me të majtën. Nuk e vura re menjëherë. Ne donim të linim Endrick të ekzekutonte penalltinë e pestë , por më pas shkuam drejt e te Rudiger”, tha tekniku italian për penalltinë e diskutueshme të agjentinasit.
Trajneri i Real Madridit më vonë bëri një analizë të përgjithshme të ndeshjes, shkruan a2cnn.”Ndeshja ishte e vështirë dhe e komplikuar, ne u munduam të shënonim. Ne e duam shumë këtë kompeticion dhe donim të ecnim përpara. Jemi të shtrydhur, por të lumtur”, deklaroi Ancelotti.
