Florentino Pérez, president i Real Madridit, ngushëlloi Luka Modriqin gjatë dorëzimit të medaljeve pas humbjes së rëndë 2-5 ndaj Barcelonës në finalen e Superkupës së Spanjës.
“Ndonjëherë duhet ta humbasim një finale, apo jo?”, i tha presidenti i Madridit futbollistit kroat 39-vjeçar në një imazh të kapur nga kamerat e Futbol në Movistar Plus+.
Luka Modriq, i cili erdhi te Real Madridi në vitin 2012 nga Tottenhami, ka fituar 22 tituj (përfshirë gjashtë Superkupa) me fanellën e Madridit.
“Ky është futboll, dhe në futboll ka fitore dhe humbje. Këtë herë humbëm. Asnjëherë nuk është bukur të humbësh, por nëse duhet të zgjedhësh një humbje, është më mirë të jetë në Superkupë. Duhet të përgëzojmë Barcelonën, sepse ishin më të mirë,” e pranoi Modriq pas ndeshjes.
Futbollisti kroat shprehu hidhërimin për të pësuar një tjetër humbje të thellë kundër Barcelonës: “Nuk është bukur që rivali yt më i madh të të shënojë nëntë gola në dy ndeshje.”
Finalet e luajtura nga Real Madridi
Gjatë gjithë historisë së tij, Real Madridi ka luajtur 109 finale të kompeticioneve zyrtare.
Në Ligën e Kampionëve (ose Kupën e Europës), Real Madrid ka luajtur 18 finale dhe ka fituar 15 prej tyre.
