Kanë përfunduar bisedimet mes përfaqësuesve të Shteteve të Bashkuara dhe Rusisë në Arabinë Saudite.
Takimi mes Sekretarit Amerikan të Shtetit, Marco Rubio, dhe ministrit të Jashtëm të Moskës, Sergej Lavrov, në Arabinë Saudite ka zgjatur për katër orë.
Më pas u panë të dilnin për një pushim të shkurtër, që u shndërrua në një drekë pune. Delegacioni amerikan ende nuk ka dhënë detaje lidhur me bisedën e zhvilluar, që për ta kishte në fokus shkrirjen e marrdhënieve të ngrira nga nisja e luftës në Ukrainë.
Diplomatët nga Rusia kanë sqaruar se “ka nisur një dialog shumë konstruktiv dhe tepër pozitiv”.
“Ndryshe nga administrata Biden, që kurrë nuk u përpoq të dëgjonte qëndrimin e Rusisë, kjo ishte një përpjekje e qartë për nisjen e dialogut për të kuptuar pozitën e Moskës dhe diskutuar gjërat, për të cilat mund të pajtohemi”, u shpreh, Juri Ushakov, këshilltari i presidenti rus, Vladimir Putin.
Ai shtoi se takimi nuk ishte i keq, pasi palët zhvilluan një diskutim serioz për të gjitha çështjet, duke lënë të kuptohet se është folur dhe për Ukrainën, shkruan A2 CNN.“Ne jemi pajtuar që të marrim parasysh interesat e njëri-tjetrit dhe të zhvillojmë marrëdhënie dypalëshe, pasi Moska dhe Uashingtoni janë të interesuar për këtë”, theksoi zyrtari rus. Ai shtoi më tej se palët ranë dakord që një “ekip i veçantë negociatorësh do të vendosë kontakte në kohën e duhur”.
