Presidenti i Shteteve të Bashkuara të Amerikës (SHBA), Joe Biden, mbërriti në Meksikë të dielën, që është vizita e parë e një presidenti amerikan në këtë vend në nëntë vitet e fundit, raporton Anadolu Agency (AA).
Vizita e Biden në Meksikë vjen në kohën e rritjes të shkëmbimit tregtar midis dy vendeve, por edhe shqetësimeve në rritje të SHBA-së për emigrimin e parregullt dhe një numër historik të vdekjeve nga mbidoza e drogës.
Presidenti amerikan u prit në Aeroportin Ndërkombëtar “Felipe Angeles” nga homologu i tij meksikan Andres Manuel Lopez Obrador me nderimet më të larta shtetërore.
Të dy homologët do të zhvillojnë një takim dypalësh të hënën dhe një ditë më pas do të mbahet samiti “Tres Amigos” së bashku me kryeministrin kanadez, Justin Trudeau.
Para vizitës së tij në Meksikë, Biden udhëtoi në El Paso, në shtetin amerikan të Teksasit, që është vizita e tij e parë në kufirin SHBA-Meksikë që nga marrja e detyrës.
“Ata kanë nevojë për shumë burime. Ne do t’ua ofrojmë ato”, tha Biden në El Paso, ku kaloi katër orë.
El Paso është aktualisht korridori më i madh për kalimet e paligjshme në SHBA.
Gjatë vizitës, Biden u takua me guvernatorin e Teksasit, Greg Abbott, i cili ka qenë një kritik i zëshëm i politikave të emigracionit të administratës aktuale të SHBA-së.
“Ai duhet të lëvizë dhe të ndërmarrë veprime të shpejta, duke përfshirë kompensimin e shtetit të Teksasit për paratë që kemi shpenzuar, por gjithashtu duke siguruar më shumë burime për qeverinë federale që të bëjë punën e saj”, tha Abbott.
Numri i emigrantëve që kalojnë kufirin SHBA-Meksikë u rrit në mënyrë dramatike gjatë dy viteve të para të administratës së Biden. Vitin e kaluar, u ndaluan më shumë se 2,38 milionë emigrantë.
Republikanët e kritikuan vizitën në qytetin kufitar të presidentit Biden, duke e cilësuar si hap për përfitime politike. Kryetarja e Komitetit Kombëtar Republikan, Ronna McDaniel, mbajti një konferencë të veçantë për shtyp në qytetin kufitar McAllen për të kritikuar “planin katastrofik të sigurisë kufitare të Biden dhe ndikimin e tij në komunitetet kufitare të Teksasit”.
