“E vërteta është se kërcënimi ndaj demokracisë nuk janë unë, por Kamala Harris dhe Demokratët”. Këtë pretendim e tha Donald Trump gjatë një tubimi elektoral në Uniondale të Long Island për zgjedhjet presidenciale të këtij viti.
Ai kërkoi nga rivalja që të mos thotë më gënjeshtra kundër tij dhe që proceset gjyqësore të ndalen. “Mjaft me deklaratat se do ta kthej Amerikën në diktaturë”, u shpreh ai.
Trump vijoi me sulmet në drejtim të demokrates Harris duke përdorur dhe sloganin e famshëm të tij: “Kamala je e pushuar!”.
“Më lejoni që t’i dërgoj një mesazh të drejtpërdrejtë Kamala Harris. Keni dëgjuar për të? Meqë ra fjala, ajo u vlerësua tani nga senatori më liberal në Senatin amerikan, i cili është madje edhe më i majtë se Bernie Sanders dhe Pocahontas. Po, ajo tani është edhe më e majtë se Pokahontas”, tha Donald Trump, kandidat republikan për president.
Trump u përpoq të reklamonte librin e bashkëshortes të publikuar së fundi, por përfundoi duke pohuar se nuk e ka lexuar atë.
“Shkoni dhe blini librin e saj. Sapo shkroi një libër. Shpresoj që të ketë thënë gjëra të mira për mua. Nuk e di… nuk e kam lexuar. Kam qenë shumë I zënë. Sapo shkroi librin me titull ‘Melania’. Nëse ajo thotë gjëra të këqija për mua, do ju bëj këtë thirrje: ‘Mos e blini atë.”
Ndërkohë, një sondazh i fundit i publikuar nga Fox News, nxjerr në avantazh demokraten Harris me 2 pikë përqindje, konkretisht 50 për qind të preferencave, kundrejt 48 për qind që zotëron Trump. I zënë ngushtë nga shifrat, ish-presidenti ashpërsoi tonet duke deklaruar se vetëm republikanët janë konservatorët që i përkasin të vetmes parti të mirëbesimit.
Nuk ka munguar dhe sulmi i radhës ndaj presidentit aktual, Joe Biden, duke e akuzuar se po punon me Iranin që ka shënjestruar fushatën e tij me një sulm kibernetik. Në fakt, inteligjenca amerikane dhe FBI konfirmuan se hakerat iranianë vodhën informacione nga fushata e Trump dhe ia dërguan atë fushatës së Biden. Por nuk ka asnjë konfirmim që demokratët iu përgjigjën atyre apo i përdorën ato informata. (A2 Televizion)
