Presidenti amerikan Donald Trump u shpreh se nuk beson që marrëveshja e armëpushimit në Gaza do të zbatohet, duke shtuar se “kjo nuk është lufta jonë”.
I pyetur gjatë ceremonisë së nënshkrimit në Zyrën Ovale në ditën e parë të inaugurimit të tij se sa i sigurt është ai se marrëveshja do të vazhdojë në të tre fazat, Trump u përgjigj: “Unë nuk kam besim. Nuk është lufta jonë. Është lufta e tyre. Mendoj se janë shumë të dobësuar në anën tjetër”.
“Unë pashë një foto të Gazës. Gaza është një vend me shkatërrim masiv. Ai vend vërtet duhet të rindërtohet në një mënyrë tjetër”, tha Trump, duke shtuar:
“Gaza është interesante. Është një vend fenomenal në det, me mot më të mirë, e dini, gjithçka është mirë. Disa gjëra të bukura mund të bëhen me të, është shumë interesante, disa gjëra fantastike mund të bëhen me Gazën”.
Izraeli nisi një luftë gjenocidale në Gaza duke vrarë rreth 47 mijë palestinezë, shumica prej tyre gra dhe fëmijë, që nga sulmi ndërkufitar nga grupi palestinez Hamas më 7 tetor 2023.
Të dielën hyri në fuqi një marrëveshje armëpushimi dhe shkëmbimi i të burgosurve midis Izraelit dhe Hamasit.
Gjykata Ndërkombëtare Penale lëshoi urdhërarreste në nëntor të vitit të kaluar për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me padi për gjenocid në Gjykatën Ndërkombëtare të Drejtësisë për luftën e tij kundër Gazës.
Gjatë fjalëve të tij në Capitol One Arena më herët, i dërguari i Trump-it për Lindjen e Mesme, Steve Witkoff, tha se lidershipi i Trump-it “ka ripërcaktuar mundësitë në ndjekjen e përparimit dhe stabilitetit në Lindjen e Mesme”, raporton Anadolu.”Qasja e tij vendimtare, pragmatike, siguron që edhe konfliktet më të rrënjosura të përballen me perspektiva të reja dhe strategji novatore. Politikat e tij tashmë kanë sjellë suksese të jashtëzakonshme, si lirimi i djeshëm i pengjeve në Gaza”, tha ai, duke shtuar:
“Kjo arritje demonstron forcën e udhëheqjes së Presidentit Trump dhe respektin që ai komandon në skenën globale”.
