Presidentja e Komisionit Evropian ka bërë thirrje për një `pauzë humanitare` e cila çon në `armëpushim të qëndrueshëm` në Gaza.
Në fjalën e saj në Parlamentin Evropian, presidentja e KE-së, Ursula von der Leyen u ndal dhe te përpjekjet e BE-së për rritjen e ndihmës humanitare në Gaza. Ajo bëri me dije se një anije është nisur mëngjesin e sotëm për në Gazën veriore.
Populli i Gazës ka nevojë për një pauzë të menjëhershme humanitare që do të çonte në një armëpushim të qëndrueshëm dhe ata kanë nevojë për të tani. Ndërsa flasim, një anije po niset nga Qipro për në Gazën veriore. Ai mbart llojin më elementar të ndihmës humanitare”, tha ajo, duke shtuar se “ky korridor detar është rezultat i bashkëpunimit të paprecedentë ndërkombëtar”.
Von der Leyen theksoi se situata në terren është më dramatike se kurrë dhe ka arritur një pikë kthese.
“Të gjithë kemi parë raporte të fëmijëve që vdesin nga uria. Kjo nuk mund të jetë dhe ne duhet të bëjmë të pamundurën për ta ndaluar atë”, tha ajo.
Von der Leyen njoftoi gjithashtu se mekanizmi i mbrojtjes civile të BE-së është aktivizuar për të forcuar mbështetjen, shkruan rtsh.“Ne do të vazhdojmë me pagesën e 50 milionë eurove në mbështetje të UNRWA dhe këstet e ardhshme do të lirohen sapo agjencia të marrë hapat e tjerë që kemi rënë dakord së bashku. E gjithë kjo me një qëllim të thjeshtë: që çdo euro që investojmë të shpenzohet sipas rregullave tona dhe të arrijë tek palestinezët në nevojë. Natyrisht, Izraeli ka të drejtë të mbrohet dhe të luftojë kundër Hamasit. Por mbrojtja e civilëve duhet të sigurohet në çdo kohë në përputhje me ligjin ndërkombëtar”, u shpreh ajo.
