Presidentja Vjosa Osmani ka thënë se Kosova do të ishte e hapur për diskutim me Britaninë e Madhe për çështjen e qendrave për imigrantët e paligjshëm që ia mësyjnë Mbretërisë së Bashkuar.
Një ditë më parë, kryeministri i Shqipërisë, Edi Rama, mohoi që ka marrëveshje me Britaninë, të ngjashme si atë me Italinë. E nga mediat britanike, deklarimi i Ramës u konsiderua “goditje e turpshme” për kryeministrin britanik, Keir Starmer, që po qëndron në Tiranë qe dy ditë. Starmeri është përpjekur të promovojë një plan për ngritjen e qendrave të ngjashme në vende të treta, për të strehuar azilkërkues të refuzuar nga MB-ja. Në konferencën për media në Tiranë, Starmer, u shpreh se po e diskuton një marrëveshje të tillë me disa shtete të tjera.
E të premten, e pyetur nga “Sky News” për këtë çështje, Osmani ka thënë se nuk ka diskutuar me Starmerin lidhur me qendrat e tilla.
“Nuk ka pasur bisedime zyrtare me Britaninë e Madhe për këtë çështje. Nuk është ngritur deri tash. Do të ishim të hapur ta diskutonim këtë. Gjithsesi nuk mund të them më shumë se kaq, ngase nuk i di hollësitë. Nuk mund të jap përgjigje për një kërkesë që s’është shtruar deri tash”, ka thënë ajo.
Osmani e ka quajtur Britaninë e Madhe “aleate të palëkundur” për Kosovën.
Rreth 22 mijë njerëz kanë shfrytëzuar Ballkanin Perëndimor për të hyrë në Evropë vitin e shkuar, sipas të dhënave të Britanisë së Madhe.
Ka pasur raportime se Britania po diskuton me nëntë shtete për qendra për refugjatët.
Janë gjashtë shtete të Ballkanit Perëndimor që konsiderohen si bazë që Britania e Madhe ta luftojë imigrimin ilegal. Kosova është aty krahas Kroacisë, Bosnje-Hercegovinës, Malit të Zi, Shqipërisë dhe Maqedonisë së Veriut.
Sekretari i jashtëm britanik, David Lammy, muajin e shkuar vizitoi Kosovën dhe në të njëjtën rrugë nënshkroi edhe një marrëveshje me Serbinë për të goditur kontrabandën.
“Sky News” në artikull ka theksuar se Kosova si një nga shtetet më të varfra të Evropës ka arritur marrëveshje me Danimarkën për t’i pranuar 300 të burgosur të huaj për të kryer dënimin në Kosovë para dëbimit. Marrëveshja është arritur në këmbim të 200 milionë eurove, por edhe pse e arritur më 2021, ende s’është funksionalizuar.
Qendra e azilit të Italisë në Shqipëri është strukturë që Italia e ka ndërtuar për të pranuar dhe trajtuar kërkesat për azil të emigrantëve që kapen në ujërat italiane. Në Shqipëri, në këto qendra, merret vendim për emigrantët që kapen – që të pranohen në Itali apo të kthehen në shtetet e tyre. Shqipëria garanton sigurinë, ndërsa qendrat menaxhohen nga autoritetet italiane. Projekti është paraparë të zgjasë pesë vjet.
