Presidentja e vendit, Vjosa Osmani ka përkujtuar sot viktimat e masakrës në lagjen e Kovaçëve në Mitrovicë, transmeton KosovaPost.
Osmani tha se me 14 prill 1999 forcat serbe masakruan 31 banorë teksa theksoi se kujtesa për ta është detyrim moral.
“Më 14 prill 1999, forcat paramilitare serbe masakruan mizorisht 31 banorë të lagjes së Kovaçëve në Mitrovicë. Ata u vranë vetëm pse ishin shqiptarë. U masakruan në shtëpitë dhe rrugët e tyre, në lagjen e tyre, aty ku duhej të ndiheshin të sigurt. Këta burra, gra e fëmijë do të kujtohen përherë. Kujtesa për ta është detyrim moral dhe përkushtim ndaj së vërtetës dhe drejtësisë. Krimet e tilla nuk harrohen, ndërkaq drejtësia për ta mbetet synim i vazhdueshëm i yni”, thuhet në njoftimin nga Presidenca.
