Shefja e Grupit Parlamentar të LDK-së, Hykmete Bajrami, tha se Kuvendi është shndërruar në një cirk. Sipas saj, është hera e gjashtë që Haxhiu nuk arrin të zgjidhet kryeparlamentare dhe sipas saj, LVV-ja po insiston në emrin e saj.
“Është shndërruar tanimë në një cirk. Është hera e gjashtë e kësaj radhe mori vetëm 54 vota, e ata insistojnë. LDK është për të gjetur një zgjidhje kushtetuese që respekton kushtetutën dhe rezultatin e 9 shkurtit. Ne njohim të drejtën e të parit për të propozuar, por kjo nuk do të thotë se e bartim të drejtën tonë tek një subjekt tjetër, duke votuar sipas kërkesave të tyre. Pengmarrja e institucioneve nga LVV po i kushton qytetarëve, ata po përballen me probleme të ndryshme e askush ato nuk po i adreson. Andaj përgjegjësia duhet të kërkohet prej tyre. Na vjen keq që ne, në bazë të rezultatit dhe vullnetit tonë jemi pjesë e Kuvendit, por, pa dashje jemi pjesë e këtij teatri që po besoj që është bërë mjaft për secilin qytetar të Kosovës”, tha Bajrami.
