Presidentja e vendit, Vjosa Osmani, do të ushtrojë padi, si thuhet, ndaj shpifjeve të Lirim Mehmetajt. Kjo, sipas një njoftimi nga zyra e Presidencës, në funksion të mbrojtjes së integritetit personal dhe institucional.
“Presidentja Vjosa Osmani nuk do të lejojë që shpifjet e orkestruara të kalojnë pa përgjigje. Kjo nuk është hera e parë që ky person tenton ta manipulojë opinionin me shpifje, ndaj për këtë arsye, Presidentja do t`i ndërmarrë të gjithë hapat ligjor për ta mbrojtur të vërtetën dhe për të kërkuar përgjegjësi për keqpërdorim të fjalës publike përmes përhapjes së shpifjeve e me qëllim të manipulimit të opinionit nëpërmjet dezinformatave.”, thuhet në reagimin e zyrës për informim të Presidencës.
Në këtë reagim thuhet se presidentja Osmani do të ushtrojë padi për shpifje ndaj Mehmetajt në funksion të mbrojtjes së integritetit personal dhe institucional.
“Mehmetaj nuk ka asnjë provë të vetme për shpifjet e tij dhe nuk mund të ketë, sepse ato që ai deklaron janë shpifje me tendencë të denigrimit të Presidentes dhe familjes së saj. Njëkohësisht, e njoftojmë Lirim Mehmetajn se për çdo shpifje që bëhet ndaj Presidentes edhe në të ardhmen, do të marrë përgjigjen e duhur nëpërmjet rrugëve ligjore”, thuhet në reagimin e zyrës së Presidencës.
Ndërkohë gazetari Lirim Mehmetaj sot gjatë ditës për mos deklarimin e presidentes Osmani nëse do të ri-kandidojë edhe për një mandat, ka reaguar në profilin e tij në Facebook.
Ai e quajti Osmanin si “një prej personave që s’i dha asnjë gjë politikës e i mori gjithçka”.
“Në anën tjetër, ajo mori gjithçka nga politika: pozita, pasuri shumë të madhe, status dhe një jetë më të mirë për së paku 3 brezat e ardhshëm të familjes. Vjosa Osmani është multi-milionere. Ajo e burri i saj janë të zhytur thellë në biznese te dyshimta, në Kosovë e në Shqipëri”, shkroi ai.
Mehmetaj më tutje tha se,”Osmani nuk i ka sjellë vendit asnjë zhvillim të vetëm”.
