Prokurorja e specializuar, Kimberly West, e ka mirëpritur vendimin për dënimin e Pjetër Shalës me 18 vjet burgim për krime lufte.
Sipas njoftimit të Dhomave të Specializuara të Kosovës (DHSK), West e ka quajtur këtë vendim si hap të rëndësishëm në sundimin e ligjit.
“Arritja e vënies para përgjegjësisë për krime të rënda – përfshirë edhe kundër atyre personave si z.Shala që kishin shmangur më parë për disa vjet juridiksionin e gjykatave të Kosovës – është një hap i rëndësishëm për sundimin e ligjit”, citohet të ketë thënë West.
Prokurorja gjithashtu kishte thënë se është dita që të përulemi ndaj viktimave të krimeve të Pjetër Shalës.
“Dita e sotme është gjithashtu një ditë kur ne kujtojmë dhe përulemi para viktimave të krimeve të z. Shala, që ishin kryesisht shqiptarë të Kosovës, dhe atyre familjeve që kanë pritur për një çerek shekulli që i akuzuari të vihet para përgjegjësisë”, njofton DHSK të ketë thënë West.
Ndryshe, Pjetër Shala të martën (16 korrik) është dënuar me 18 vjet burgim. Sipas kryetares së trupit gjykues, Mappie Veldt- Foglia, Shala u shpall fajtor për pikën 1, 3 dhe 4 të aktakuzës, e që është ndalimi arbitrar, tortura dhe vrasja e paligjshme. Ndërsa, u shpall i pafajshëm për trajtim mizor, pra pikën 2 të aktakuzës.
Për pikën 1 të akuzës, Shala u dënua me 6 vjet burgim, me 16 vjet burgim për pikën tre dhe 18 vjet burgim për pikën 4. Andaj, ndaj tij u shpall dënim unik me 18 vjet burigm.
Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.
Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.
“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.
