PSE NUK FITOI NASIM HARADINAJ?
Organizata e Veteranëve të luftës së UÇK-së, shkurt OVL-UÇK, në programin e vetë e ka ruajtjen e vlerave të luftës çlirimtare, por me kalimin e viteve, ajo jo që nuk i mbrojti të drejtat e luftëtarëve, por i shkeli e i përdhosi rëndë ato.
Shumë udhëheqës të kësaj organizate e keqpërdorën emrin e UÇK-së për interesat e tyre personale, klanore e politike.
Shkelja më e rëndë në kurriz të luftëtarëve ndodhi me hartimin e listave të Veteranëve, me ç’rast përfituan afër 30.000 qytetarë të Kosovës duke u bërë Veteran të rrejshëm dhe duke vjedhur dinjitetin, krenarinë dhe buxhetin e luftëtarëve, por edhe të shtetit të Kosovës.
Një dështim tjetër i kësaj organizate ishte Krijimi i Gjykatës Speciale kundër UÇK-së dhe dalja e OVLUÇK-së në krah të atyre që votuan për krijimin e kësaj Gjykate antishqiptare. Në fakt ata do të duhej të dilnin kundër krijimit të Gjykatës dhe nëse ajo do të votohej, ndërsa në pamundësi për të penguar krijimin e saj, Kryesia e OVLUÇK, do të duhej të jepte dorëheqje morale, duke treguar mospajtueshmërinë e tyre me një vendim të tillë politik.
Për të gjitha këto që u thanë më lartë, pjesë goxha të madhe të fajit mban edhe Hysni Gucati, ish-Kryetar i OVLUÇK-së deri në arrestimin e tij nga Gjykata Speciale dhe tani poashtu Kryetar i rizgjedhur i kësaj Organizate të luftës.
Prandaj,
Duke u bazuar në këto që shkrova më lart, si veprimtar i LPK-së, si luftëtar dhe si njëri nga themeluesit e UÇK-së, dyshoj se:
1. Në Kuvendin Zgjedhor të OVLUÇK-së ka pasur keqpërdorime dhe linqime politike të personalitetit të Nasim Haradinajt.
2. Kërkoj urgjentisht që Kuvendi Zgjedhor i OVLUÇK-së të përsëritet dhe të ketë transparencë gjatë gjithë fushatës zgjedhore të kësaj organizate të luftës së UÇK-së!
3. Kërkoj nga gjithë luftëtarët e UÇK-së që ti bashkohen kësaj kërkese për ripërsëritjen e zgjedhjeve në OVLUÇK-së!
4. Kërkoj nga të gjithë ata që duan rikthimim e dinjitetit të luftëtarit të UÇK-së, që përmes nënshkrimit të peticionit, të kërkojnë Zgjedhje të reja e transparente në OVLUÇK!
PS: Nuk njihem nga afër me asnjërin nga dy kandidatët për Kryetar të OVLUÇK-së dhe nuk kam asgjë personale kundër Hysni Gucatit, por mendoj se Nasim Haradinaj, duhet të jetë Kryetar i OVLUÇK-së, duke u bazuar në veprimtarinë e tij jetësore e familjare, por dhe duke u bazuar në qëndrimin e tij heroik në Gjykatën Speciale!
Shkruan:
Mr.sc. Metush Zenuni – Veprimtar i LPK-së, luftëtar dhe njëri nga themeluesit e UÇK-së.
Fribourg -Zvicër, 19 janar 2025
