Në kuadër të konferencës vjetore për shtyp në Moskë, presidenti rus Vladimir Putin ka propozuar një “duel të teknologjisë së lartë” midis raketës balistike hipersonike Oreshnik të Rusisë dhe sistemeve të mbrojtjes raketore amerikane.
Ai sugjeroi që të dyja palët të zgjedhin një objektiv të caktuar dhe të testojnë aftësitë e mbrojtjes raketore për të interceptuar raketat ruse.
Putin e hodhi këtë propozim pasi Rusia lansoi për herë të parë raketën Oreshnik në qytetin ukrainas Dnipro më 21 nëntor, duke e konsideruar atë si një përgjigje ndaj përdorimit të raketave amerikane dhe britanike nga Ukraina për të sulmuar territoret ruse, me mbështetje perëndimore.
Në komentet e tij, Putin theksoi se sistemet raketore të armiqëve e kanë të pamundur të rrëzojnë raketën ruse Oreshnik.
“Le t’u propozojnë atyre në Perëndim dhe SHBA-ve që ekspertët që i paguajnë për analizat e tyre, të bëjnë një lloj eksperimenti teknologjik, le të themi, një duel të teknologjisë së lartë të shekullit të 21-të.”,- tha Putin.
Putin sugjeroi që të dyja palët të zgjedhin një qytet, si Kievi, dhe Perëndimi të fokusohet në mbrojtjen ajrore dhe raketore të tij, teksa Rusia do të godasë me raketën Oreshnik, shkruan ora news.al.Ai e mbylli propozimin duke thënë: “Ne jemi gati për një eksperiment të tillë, por a është gati pala tjetër?”
