Qeveria e Kosovës në mbledhjen e sotme ka prezantuar vlerën e një keoficienti për pagat në sektorin publik, i cili pritet të jetë 105 euro për vitin 2023.
Kryeministri i Kosovës, Albin Kurti, ka bërë të ditur se vlera e koeficientit të Ligjit të Pagave është 105 euro për vitin 2023, ndërkaq, tha se në vitin 2024 sipas llogaritjeve të bëra vlera e koeficientit do të jetë 110 euro.
Në mbledhjen e qeverisë të mërkurën, Kurti tha se përmes miratimit të koeficientit do të rriten pagat në sektorin publik.
Ai po ashtu tha se shumë shpejtë do të miratohet në lexim të dytë Projektligji për pagën minimale.
Ligji për Pagat në sektorin publik është miratuar në dhjetor në lexim të dytë në Kuvendin e Kosovës.
Sipas Ligjit për ndarjet buxhetore 2023, i miratuar po ashtu në dhjetor të vitit të kaluar, buxheti i përgjithshëm për paga në sektorin publik është 745 milionë euro.
