Qindra biznese kanë dorëzuar tashmë dëshmitë që vërtetojnë se nuk kanë më shumë se 50 punëtorë, dhe se qarkullimi i tyre vjetor nuk e kalon shumën prej 10 milionë eurosh. Këto dëshmi janë të domosdoshme për të vazhduar furnizimin me energji elektrike nga KESCO, pa qenë të detyruara të dalin në tregun e hapur të energjisë.
Megjithatë, mijëra biznese të tjera ende nuk e kanë kryer këtë obligim dhe afati i fundit për dorëzimin e dokumentacionit po përfundon këtë javë, pra është aktiv deri të premten, më 21 mars.
Këto dy dokumente duhet të dorëzohen në njërën nga qendrat e shërbimit me konsumatorë të KESCO-s që gjenden anekënd Kosovës ose në email adresën: komerciale@kesco-energy.com
Bizneset që nuk i sjellin dëshmitë që merren në Administratën Tatimore të Kosovës, pavarësisht madhësisë së tyre, me vendim të ZRRE-së, nuk do të mund të furnizohen nga KESCO me tarifa të rregulluara, por do të dalin në treg të hapur dhe duhet ta gjejnë vetë furnizuesin.
Për të sqaruar tutje, një biznes nuk do të bëhet pjesë e tregut të hapur nëse sjell dëshmitë që nuk ka mbi 50 punëtorë ose mbi 10 milionë euro qarkullim vjetor. Mungesa e dërgimit të këtyre dëshmive i dërgon me automatizëm në treg të hapur.
Për këtë arsye, u bëjmë thirrje të gjithë bizneseve që ende nuk kanë dorëzuar dëshmitë e nevojshme që ta bëjnë këtë sa më parë, për të shmangur rrezikun e ndërprerjes së furnizimit ose detyrimin për të blerë energji në kushte të pasigurta. Procesi i dorëzimit është i thjeshtë dhe mund të bëhet nëpërmjet kanaleve zyrtare të KESCO-s.
Liberalizimi i tregut të energjisë është një hap i rëndësishëm për ekonominë dhe konkurrencën, por është thelbësore që bizneset të jenë të informuara dhe të përgatitura për ndryshimet që kjo sjell. Mosrespektimi i afateve dhe mungesa e dokumentacionit të kërkuar mund të ndikojë drejtpërdrejt në furnizimin e tyre me energji elektrike dhe procesin e afarizmit të tyre, prandaj duhet t’u përmbahen strikt afateve të përcaktuara në koordinim me ZRRE-në. Ky organ është institucioni vendimmarrës në këtë rast, ndërsa KESCO si Furnizues i Shërbimit Universal është organ zbatues i vendimeve.
Për më shumë informata, bizneset mund të kontaktojnë KESCO-n përmes linjave të dedikuara të shërbimit për konsumatorë në qendrat tona anekënd Kosovës ose në linjat e dedikuara për komunikim me konsumatorë.
