Tradita e kuzhinës shqiptare ofron një larmishmëri recetash e gatimesh speciale, nga ato që tërheqin oreksin me shijen e tyre fantastike.
Një prej këtyre recetash, qoftet me salcë arrash është ndër gatimet me shijen më të përkryer që lezetosin tryezën kur i përgatit e shërben.
Përgatitja e qofteve dhe recetat e pafundme në kombinimin e tyre me perime nga më të ndryshme a me mish të grirë, të përgatitura thjeshtë e të shoqëruara me salcë domatesh, arrash e të tjera përbërës janë një mënyrë ideale për të kënaqur gjithë familjen.
AgroWeb.org u sugjeron më poshtë një recetë tradicionale të përgatitjes së qofteve të shtëpisë me salcë arrash, një kombinim perfekt shijesh e aromash.
Përgatitja e Qofteve me Salcë Arrash
Përbërësit
(Përbërësit më poshtë janë për 3-4 persona)
500 gr mish i grirë
1 kokërr qepë
4-5 thelpinj hudhra
1 kokërr vezë
Gjysmë filxhan çaji me arra të shtypura
Një lugë gjelle majdanoz
Dy lugë gjelle miell
Gjysmë filxhan çaji me verë të bardhë
Kripë
Piper
Vaj ulliri
Përgatitja
Përgatitet masa e qofteve si zakonisht por në vend të bukës i hidhet pak miell, pastaj hidhen mishi i grirë, veza, qepa, hudhrat, majdanozi, kripa dhe piperi.
Pasi përpunohet brumi, priten disa copëza të vogla për çdo racion.
Secilës prej copëza u jepet një formë sferike e cila nuk duhet të jetë më shumë se një kokërr arrë.
Më pas të gjitha qoftet i kalojmë në miell dhe i skuqim në vaj të nxehtë.
Pasi janë skuqur të gjitha qoftet, në tigan hedhim miellim dhe e kaurdisim derisa të zverdhet.
Në këtë moment hedhim verën, lengun e mishit ose ujë, dhe sapo të nisë të marrë një valë e hedhim në një tavë, në të cilën më parë kemi vendosur qoftet.
Pasi qoftet të marrin një valë me salcën shtohen arrat e shtypura mirë dhe të holluara me pak lëng.
Tava vendoset në zjarr ose në furrë të parangrohur edhe për 10-15 minuta të tjera.
Shërbehet e ngrohtë e ndarë në pjatanca dhe me pak majdanoz të grirë hollë sipër.
