Zëvendësministri i Drejtësisë, Vigan Qorrolli ka njoftuar se në sesionin e 142-të Plenar të Komisionit të Venecias janë miratuar tri opinione kyçe të reformës në Drejtësi në Kosovë.
Qorrolli tha se ky miratim nuk është thjesht një hap procedural, por një fitore politike, juridike dhe morale për qytetarët e Kosovës.
Postimi i tij i plotë:
NJË HAP HISTORIK PËR DREJTËSINË NË KOSOVË!
Sot, në Sesionin e 142-të Plenar të Komisionit të Venecias, u miratuan tri opinione ligjore për projektligjet kyçe të Reformës në Drejtësi në Republikën e Kosovës. Ky është një moment historik, një dëshmi se drejtësia në Kosovë po kalon nga një periudhë tranzicioni në një fazë të konsolidimit të saj si shtyllë e pavarur dhe e pakompromis e shtetit të së drejtës.
Ky miratim nuk është thjesht një hap procedural, është një fitore politike, juridike dhe morale për qytetarët e Republikës së Kosovës. Reforma në drejtësi nuk është luks dhe as thjesht një domosdoshmëri teknike, është themeli mbi të cilin ndërtohet një shoqëri e drejtë dhe e lirë.
Drejtësia e pavarur është garancia për liritë dhe të drejtat e qytetarëve, për barazinë para ligjit dhe për ndërtimin e një shteti që i shërben qytetarit, jo interesave të grupeve apo individëve të fuqishëm.
Projektligjet e miratuara janë thelbi i kësaj reforme:
Projektligji për Këshillin Gjyqësor të Kosovës: garanton një gjyqësor të pavarur dhe të mbrojtur nga ndërhyrjet politike dhe ekonomike.
Projektligji për Akademinë e Drejtësisë: krijon themelin për një sistem profesionalizmi dhe përgjegjshmërie në përgatitjen e gjyqtarëve dhe prokurorëve.
Projektligji për Rekrutimin, Vlerësimin e Performancës, Kontrollin e Integritetit dhe Statusin e Gjyqtarëve dhe Prokurorëve: forcon parimin e meritokracisë dhe ndëshkon çdo formë të abuzimit dhe korrupsionit në sistemin e drejtësisë.
Projektligji për Përgjegjësinë Disiplinore të Gjyqtarëve dhe Prokurorëve: vendos një mekanizëm të qartë dhe efikas për mbajtjen e sistemit të drejtësisë në standardet më të larta të etikës dhe profesionalizmit.
Kosova po dëshmon se është një shtet që nuk ndërton vetëm institucione, por ndërton drejtësi. Një shtet që e vendos ligjin mbi interesat e individëve dhe fuqinë e së drejtës mbi të drejtën e fuqisë.
Ky është vetëm fillimi. Reforma në drejtësi nuk përfundon këtu. Ndërtimi i një drejtësie të pavarur kërkon guxim, përkushtim dhe besim. Dhe ne jemi të vendosur ta çojmë këtë proces deri në fund, me ndershmëri, profesionalizëm dhe përkushtim të plotë ndaj qytetarëve të Republikës së Kosovës.
