Skuadra e Rahovecit në hendboll ka shënuar një fitore të madhe të shtunën mbrëma, duke kaluar për herë të parë në histori një kundërshtar në garat evropiane.
Në kuadër të rrethit të dytë të Kupës Evropiane, Rahoveci ka eliminuar skuadrën belge, Sezoens Achilles Bocholt, me një fitore bindëse 37:25 në palestrën “Mizahir Isma”.
Ndeshjen e parë në Belgjikë, Bocholti e kishte fituar me tri gola dallim, 32:29, por rahovecasit e kanë kthyer ndeshjen në shtëpi. Ata kanë dominuar plotësisht ndeshjen e kthimit, duke e nisur me një seri 4:0 dhe duke mbajtur epërsinë deri në fund. Pjesa e parë ka përfunduar me rezultat 16:13 për Rahovecin, ndërsa në pjesën e dytë diferenca është rritur edhe më shumë.
Egzon Gjuka ka qenë golashënuesi më i mirë për Rahovecin me dhjetë gola, ndërsa Jon Muqolli ka shënuar tetë dhe Victor Alonso ka shënuar pesë. Alban Haziri dhe Arbios Mushkolaj kanë kontribuuar me nga katër gola secili.
Kjo është hera e dytë që Rahoveci merr pjesë në garat evropiane.
Rahoveci tashmë pret shortin për të mësuar kundërshtarin e tij në raundin e tretë të Kupës Evropiane.
