Kryeministri i Shqipërisë, Edi Rama ndodhet në një vizitë zyrtare në Romë.
Gjatë konferencës së përbashkët për shtyp me Zv/Kryeministrin dhe Ministrin e Jashtëm italian, Antonio Tajani, Rama tha se për herë të parë Shqipëria nuk mund të linjëzohet me deklaratën e Bashkimit Europian.
Ai tha se për sa kohë Bashkimi Europian nuk bën një deklaratë të dytë ku t’i kthejë përgjigje mesazhit që vjen nga Beogradi me shpalljen e zisë kombëtare, qëndrimi i qeverisë shqiptare do të qëndrojë i njëjtë.
“Për sa i përket qëndrimit tonë për herë të parë në kundërshtim me një deklaratë të politikes së jashtme të Bashkimit Europian, ky qëndrim lidhet me faktin se deklarata e Bashkimit Europiam është një deklaratë e cila, jo se në vetvete ka problem, pasi adreson diçka që është thënë më parë nga përfaqësuesi Josep Borrell, lidhur me detyrimet e Kosovës në raport me dialogun, por ka një problem të madh se nuk i përshtatet realitetit të ditëve të fundit”u shpreh Rama.
Rama tha se është e pamundur që shteti shqiptar të linjëzohet me BE-në sa i përket qëndrimit ndaj Serbisë.
“Ne e kemi të pamundur të linjëzohemi me Bashkimin Europian pa parë një deklaratë të dytë që adreson problematikën e ditëve të fundit ku ka ndodhur një zhvillim dramatik, pasi është vrarë një efektiv i Policisë i Republikës së Kosovës, nga një grup kriminal që ka qenë qartësisht i komanduar për të ushtruar terror në veriun e Kosovës, gjë që u pasua nga shpallja e një dite zie kombëtare në Beograd”,tha Rama.
Sipas tij, ky është momenti për të dënuar me zë të lartë atë që ka ndodhur në veriun e Kosovës.
“Kjo për ne është e papranueshme, e pajustifikueshme, e madje është e dënueshme, sepse është jo europiane dhe sepse njëkohësisht është sinjali më i keq që Serbia mund të jepte në të njëjtën kohë për të gjithë Ballkanin dhe për gjithë Europën. Kemi kërkuar që Bashkimi Europian dhe i gjithë komuniteti Euro-atlentik të vërë alarmin në nivelin më të lartë dhe të përdorë instrumentat në dispozicion për ti kthyer përgjigje këtij mesazhi të parpanueshëm që vjen nga Beogradi me shpalljen e zisë kombëtare. Deri në momentin që nuk do të ketë një deklaratë të dytë nga Bashkimi Europian ne nuk do të linjëzohemi me deklaratën e parë. Ky është momenti për të dënuar me zë të lartë atë që ka ndodhur në veriun e Kosovës”, tha kryeministri Rama.
