Është duke vazhduar ende greva e minatorëve të Trepçës. Të njëjtit po refuzojnë të hanë dhe të pinë duke kërkuar me çdo kusht që t’u plotësohen kërkesat e tyre.
Nga momenti në moment, gjendja shëndetësore e minatorëve po shkon duke u rënduar, shkruan lajmi.net.
Këtë e ka konfirmuar për lajmi.net kryetari i sindikatës së punëtorëve në Trepçë, Ibrahim Januzi. Ai ka treguar se edhe një minator është dërguar në gjendje të rëndë në spital.
“E dina që është dalë në gjendje të rëndë, mirëpo nuk e dimë gjendjen e tij momentale, për këtë mund të flasë spitali”, tha ai.
Ai tutje tha se deri tash janë dërguar 3 minatorë në spital, por që po flitet edhe për një të katërt.
“Numri është 3 e sigurt, po flitet edhe për të katërtin”, tha tutje ai.
Januzi tha se askush nga institucionet e Kosovës nuk po e kthen kokën kah ta, duke i lënë në mëshirën e fatit gjersa gjendja po rëndohet.
“Gjendja nga momenti në moment po shkon duke u rënduar dhe asnjë institucion i Republikës së Kosovës dhe as bord as menaxhment…..gjendja është shumë e rëndë”, tha ai.
Ndryshe, kërkesat e minatorëve ndaj Qeverisë janë realizimi i pagës mujore me kohë, nga data 06-10, në fillim të çdo muaji, shkarkimi i kryeshefit dhe sigurimi shëndetësor ku përfshihen edhe kushtet e punës.
