Në kryeqytet gjatë ditës qarkullojnë mbi 120 mijë automjete, e për rregullimin e trafikut përkujdesen vetëm 55 policë. Nga Policia e cilësojnë të mjaftueshëm këtë numër.
Ekspertët e komunikacionit e vlerësojnë numër të vogël, e kryetari i Prishtinës Rama kërkon të bëhet policia komunale.
Rreth 120 mijë automjete gjatë një dite qarkullojnë në Prishtinë. Trafiku është i dendur, kolonat janë të gjata e aksidentet të shpeshta. E dallimi mes automjeteve që qarkullojnë në kryeqytet dhe numrit të zyrtarëve policorë të trafikut, është mjaft i madh.
Në komunën e Prishtinës janë vetëm 55 policë trafiku që kujdesen për rregullimin e komunikacionit. Porse, ky numër sipas kapitenit Sylejman Halili, shef i Njësisë së Trafikut Rajonal është i mjaftueshëm.
“Duhet ta keni të parasysh se Kosova i ka mbi 400 mijë automjete të regjistruara, 160 mijë automjete janë me 01 ose 120 mijë vetura futen në qytet brenda 24 orëve ose tranzitë. Numri i zyrtarëve policor për ta rregulluar çështjen e komunikacionit për momentin është i mjaftueshëm sepse ne i llogarisim tri stacione të rendit në kuadër të kryeqytetit…”, tha ai.
Halili thotë se menaxhimi I trafikut në kryeqytet varet nga komuna e Prishtinës.
“Menaxhimi nuk varet prej Policisë së Trafikut. Qytetarët duhet ta kuptojnë se përgjegjës për këtë është komuna. Kuvendi komunal e ka obligim për vendosjen e shenjave të komunikacionit e sidmomos për rregullimin e trafikut me vendaklimet e këmbësoreve, semaforëve itinerarin e autobusave, krejt kjo është përgjegjësi e Kuvendit Komunal”, shtoi Halili.
Lidhur me këtë, kryetari i Prishtinës Përparim Rama ka thënë se është e domosdoshme që kryeqyteti ta ketë policinë e vet.
“Ndihmë e madhe na vyen prej policisë për arsye se kemi taxi ilegal, autobus ilegal, parkingje ilegale, të cilat nuk janë në domen të kryeqytetit por të policisë së kryeqytetit. Përkundër faktit që Policia e Kosovës është shumë bashkëpunuese dhe mundohet me ndihmuar sa më shumë që mundet, duhet ta kemi policinë e kryeqytetit, të dedikuar pikërisht për trafik të kryeqytetit”, tha Rama.
Në këtë pikë, ekspertët e komunikacionit thonë për një menaxhim të mirë të trafikut nevojitet shtimi i numrit të policëve të trafikut.
“Në qoftë se planifikimi kërkon 10 pika atëherë duhet t’i kemi 90 policë të trafikut për tri ndërrime, që të menaxhohet në mënyrën efikase”, tha Nol Dedaj, ekspert i komunikacionit, shkruan RTK.Sipas policisë, ngarkesa më e madhe në trafik është gjatë ditëve të javës, nga e hëna në të premte, sidomos në orët e pasdites.
