Presidenti i Shteteve të Bashkuara, Joe Biden ka thënë se pret që Irani ta sulmojë Izraelin shumë shpejt, derisa po rritet frika për hakmarrjen iraniane dhe përhapjen e konfliktit në Lindje të Mesme, pas një sulmi ajror izraelit që vrau komandantët e lartë iranianë në fillim të këtij muaji në Damask të Sirisë.
Izraeli nuk e ka pranuar sulmin ndaj një konsullate iraniane në Siri, por besohet gjerësisht se ka qenë prapa tij. Zyrtarët amerikanë i kanë thënë CBS News, se një sulm i madh ndaj Izraelit mund të ndodhë së shpejti. Izraeli thotë se është gati të mbrohet. Presidenti amerikan, Biden i tha Iranit: “Mos e bëj”. “Ne jemi të përkushtuar ndaj mbrojtjes së Izraelit. Ne do ta mbështesim Izraelin, deklaroi Biden.
Irani mbështet Hamasin, grupin palestinez që lufton Izraelin në Gaza, si dhe grupe të ndryshme përfaqësuese në të gjithë rajonin, duke përfshirë disa – si Hezbollahu në Liban – që shpesh kryejnë sulme kundër izraelitëve.
Tensionet në rritje kanë bërë që vendet përfshirë SHBA-në, Britaninë e Madhe, Indinë dhe Australinë të paralajmërojnë kundër udhëtimit në Izrael. Gjermania u bëri thirrje qytetarëve të saj që të largohen nga Irani.
Kryeministri izraelit, Benjamin Netanyahu është takuar me anëtarët e kabinetit të tij të luftës mes paralajmërimeve. Qeveria izraelite nuk ka dhënë asnjë këshillë të re për popullin e saj, përveç udhëzimeve ekzistuese për të rezervuar ujë, ushqim për tre ditë dhe ilaçe thelbësore.
Radio izraelite, megjithatë, raportoi se autoriteteve lokale u ishte thënë të përgatiteshin për mundësinë e një sulmi, duke përfshirë vlerësimin e gatishmërisë së strehimoreve publike.
Trembëdhjetë persona u vranë në sulmin me raketa të 1 prillit në konsullatën iraniane në Damask.
Ata përfshinin udhëheqës të lartë ushtarakë iranianë, mes tyre gjeneral Mohammad Reza Zahedi, një komandant i lartë i Forcave elitare të Iranit Quds në Siri dhe Liban.
Zyrtarët në disa vende janë përpjekur të largojnë Iranin nga nisja e një sulmi, nga frika se mund të ndezë një luftë më të gjerë rajonale.
Konflikti ka parë gjithashtu Izraelin të shkëmbejë zjarr pothuajse çdo ditë përgjatë kufirit të tij verior me Hezbollahun, ndërsa grupet e mbështetura nga Irani në Irak dhe Jemen janë përpjekur të godasin territorin izraelit, si dhe bazat e SHBA-së në Irak dhe Siri.
Lëvizja Houthi e Jemenit ka sulmuar gjithashtu anijet në Detin e Kuq, duke fundosur të paktën një anije dhe duke bërë që SHBA dhe Britania e Madhe të kryejnë sulme ajrore ndaj objektivave Houthi në Jemen.
