Kreu i Aleancës për Ardhmërinë e Kosovës, Ramush Haradinaj ka thënë se paga minimale prej 350 euro për të cilën vendosi sot Qeveria, është poshtërim e se po bëhet për qëllime elektorale.
Tutje Haradinaj shprehet se paga minimale qysh sot duhet të jetë 450 euro.
“Ata që s’kanë preokupim tjetër përpos si të mbeten në pushtet, gjithmonë në prag të zgjedhjeve, dalin me mashtrimet e radhës për rritje pagash, ulje çmimesh, vende pune e lloj-lloj mrekullirash të tjera. Në kuadër të një fushate për zgjedhje, Qeveria e VV-së, sot paska marrë vendim që të rritet paga minimale në 350 euro. Premtimi për këtë pagë minimale është poshtërim”, ka shkruar Haradinaj.
Haradinaj ka thënë se Kurti , jo vetëm se është vonuar për këtë vendim, por pagën minimale e konsideron “ndihmë sociale”.
“Paga minimale qysh sot duhet të jetë 450 euro, e që në ditën e parë të qeverisë së re, më së paku 500 euro, natyrisht duke shënuar rritje të përvitshme, në bazë të rritjes ekonomike e inflacionit dhe në këtë pagë minimale duhet të përfshihen të gjitha kategoritë e pensioneve. Vendet e rajonit, qysh moti e kanë kaluar pragun e pagës minimale prej 500 eurosh, ndërsa ky kryeministër, jo vetëm që është vonuar me rritje pagash për katër vjet, por edhe sot pagën minimale e konsideron ndihmë sociale”, theksoi Haradinaj.
Theksojmë se Qeveria e Kosovës sot miratoi propozim-vendimin që niveli i ri i pagës minimale të jetë 2 euro për orë për punë të rregullt apo 350 euro bruto në muaj për punë me orar të plotë.
