Sociologia Bukurie Rrustemi vlerëson se tolerance fetare është karakteristikë për popullin shqiptar dhe atë qysh prej kohës së Rilindjes Kombëtare.
“Toleranca fetare është karakteristikë për popullin shqiptar në përgjithësi, madje në Evropë është dhe ka qenë dhe besoj që do të jetë një shembull shumë i mirë i tolerancës fetare, një nivel jashtëzakonisht i kënaqshëm. Për arsye se ndoshta me epokën e Rilindjes Kombëtare që na ka karakterizu në njëfarë mënyre me një edukim apo emancipim të përgjithshëm për respektimin e njëri-tjetrit dhe besimin e secilit duke mos e diskriminuar në asnjë rrethanë, duke u bazu në aspektin fetar”, ka thënë Rrustemi në emisionin Fanari në Tëvë 1.
Madje sipas saj kjo është vërejtur edhe në martesa mes personave të besimeve të ndryshme.
“Nuk ka pasë pengesa as në martesa, janë bërë martesa edhe me fe të ndryshme, mandej në shkollë apo çfarëdo sfere shoqërore nuk ka pasë pengesa përkatësia fetare. Dhe konsideroj që është shumë e rëndësishme sepse respekti i fesë së tjetrit është në njëfarë mënyre respekt për fenë që ne e kemi. Në radhë të parë kur ne e respektojmë tjetrin ne e tregojmë kulturën, vetëdijen tonë të ngritur fetare, japim edhe shembull për pastërtinë e fesë islame”, thotë ajo.
Rrustemi megjithatë shprehet se shoqëria e ka njëfarë turpi për ta shprehur besimin fetar.
“Shpeshherë te shoqëria e kam vërejt një femonen në njëfarë mënyre si ndihen të turpëruar për ta shprehur besimin fetar. Gjë që mendoj që është e gabuar. Besimi fetar është e drejtë elementare e secilit person, madje është e garantuar edhe me Kushtetutën e Republikës së Kosovës. Shprehja që i përket një feje konsideroj që është shumë e mirë”, deklaron tutje ajo.
Sipas Rrustemit ka edhe media që propagandojnë duke nxitur urrejtje fetare.
“Disa media shpeshherë e paraqesin një llog propagande apo imazhi të keq të fesë muslimane, me tituj që nuk janë aspak profesionalë por që ngërthejnë në vete vetëm urrejtje fetare. Mandej kronikat që shfaqen duke e shpërfaqë dhe duke e gjetë si fajtore pikërisht besimin. Duhet me pasë një reduktim të gjuhës së urrejtjes, duhet të ketë një korrigjim të asaj që ne prezantojmë në radio në televizione e kështu me radhë”.
