Ministrja e Mjedisit dhe Planifikimit Hapësinor e Kosovës, Fitore Pacolli, ka zhvilluar një takim në Londër me Ministren e Mjedisit të Mbretërisë së Bashkuar, Mary Creagh, ku u diskutua për bashkëpunimin në fushën e mbrojtjes së mjedisit, përcjell KosovaPost.
Në takim, ku ishte i pranishëm edhe Ambasadori i Kosovës në Londër, Ilir Kapiti, palët shkëmbyen përvoja lidhur me menaxhimin e ujërave, mbrojtjen nga vërshimet, si dhe avancimin e riciklimit të mbeturinave. Po ashtu u diskutua edhe për përdorimin e teknologjisë digjitale në monitorimin e parqeve kombëtare, me qëllim mbrojtjen më efektive të natyrës.
Të dyja palët u pajtuan për intensifikimin e bashkëpunimit ndërmjet Kosovës dhe Mbretërisë së Bashkuar, përmes projekteve konkrete që synojnë mbrojtjen e mjedisit dhe përmirësimin e mirëqenies së qytetarëve.
Gjatë takimit, ministrja Pacolli i dhuroi homologes britanike një punim filigrani nga Qendra për Promovimin e të Drejtave të Grave, që pasqyron historinë e viktimave të dhunës seksuale nga forcat serbe gjatë luftës në Kosovë, si dhe çajra organikë nga malet e Kosovës./KosovaPost/
