Rusia i tha Austrisë se do të pezullojë dërgesat e gazit nga e shtuna, një zhvillim që sinjalizon një fund të shpejtë të flukseve të fundit të gazit të mbetur nga Moska në Evropë.
Pezullimi do të thotë se Rusia tani do të furnizojë vetëm vëllime të konsiderueshme gazi për Hungarinë dhe Sllovakinë, në kontrast të plotë me dekadat e dominimit që e panë atë të plotësonte 40% të nevojave të BE-së për gaz përpara pushtimit të Ukrainës nga Moska në vitin 2022.
Austria ishte vendi i parë i Evropës Perëndimore që bleu gazin rus kur Bashkimi Sovjetik nënshkroi një kontratë gazi në vitin 1968, vetëm disa muaj para pushtimit sovjetik të Çekosllovakisë. Ndalimi i gazit rus vjen si përgjigje ndaj një vendimi të arbitrazhit nga Dhoma Ndërkombëtare e Tregtisë, e cila i dha kompanisë austriake 230 milionë euro në lidhje me mosmarrëveshjen që pati me kompaninë ruse të gazit Gazprom.
Austria është një nga vendet e pakta evropiane që ende varet nga gazi rus, pasi pjesa tjetër e kontinentit ka reduktuar importet pas pushtimit të Ukrainës. OMV tha se është duke u përgatitur për ndërprerjen eventuale të gazit rus dhe se ende mund të dërgojë gaz për klientët e saj duke importuar nëpërmjet Gjermanisë, Italisë dhe Holandës.
Kompania austriake e OMV ka tre vjet që po përgatitet për këtë skenar.
Sipas kancelarit Karl Nehammer, Austria do t’i përmbahet politikës së saj për Ukrainën pavarësisht ndalimit të dërgesave. “Nuk do të lejojmë që të na shantazhojnë apo gjunjëzojnë”, tha kreu konservator i qeverisë , shkruan A2 CNN.Austria ishte përgatitur për këtë eventualitet me rezerva të mjaftueshme, theksoi ai.
