Dy rusë të cilët u larguan nga diktuara e Rusisë, emigruan në Serbi pasi kishin qëndrime kundër luftës në Ukrainë. Por, pushteti i Vuçiqit as në Serbi nuk i lejoi të jetojnë, duke u dhënë urdhër që brenda 30 ditëve ta lëshojnë Serbinë. Anamari Repiq, sjell detajet.
Ellena Koposova u largua nga Rusia disa vite më parë dhe gjeti strehim në Serbi. Por ikja nga diktatura nuk është fundi i problemeve të saj. Tani ajo kërcënohet me dëbim për shkak të pikëpamjeve të saj kundër luftës.
“Unë nuk kam bërë asgjë që do të ishte kërcënim për sigurinë e Serbisë, siç thuhet në vendim te policisë, dhe mund të them vetëm, në analogji me rastet e tjera të rusëve me qëndrime kundër luftës, arsyeja për dëbim është nënshkrimi im në letrën kundër luftës”, thekson ai.
Koposova, një përkthyese letrare, jeton me burrin dhe dy fëmijët e saj në një qytet të vogël afër Beogradit. Qetësia e tyre u prish me vendimin e shtetit serb që si “rrezik i papranueshëm sigurie”, ajo duhet të largohet nga vendi brenda 30 ditëve.
Arsyeja nuk dihet sepse këto raste janë klasifikuar si “konfidenciale”, por besohet se ato janë pikëpamjet e saj kundër luftës në Ukrainë dhe presidentit rus Vladimir Putin. Rasti i saj nuk është i vetëm. Disa aktivistë rusë me qëndrime kundër luftës janë urdhëruar të largohen nga Serbia nën akuzat e paqarta se paraqesin një “kërcënim sigurie”.
“Kjo luftë po bëhet në emrin tonë, por askush nuk e ka pyetur popullin rus nëse ata e duan këtë luftë apo jo. Ne nuk e pranojmë këtë, dhe duam që bota ta dinë këtë. Arsyeja e vërtetë e dëbimit të qytetarëve rusë është se ne në protestat tona po dërgojmë mesazhe se ‘Rusia nuk është Putin’ dhe ‘Putini është një kriminel lufte”, tha për RTK, Pyotr Nikitin, aktivist rus.
Një numër i madh i ruseve kanë ardhur në Serbi që nga fillimi i invazionit rus ne Ukrainë. Ata shpesh kundërshtojnë hapur politikat e Kremlit. Ellena Koposova tani po përgatit një beteje juridike për të treguar se qëndrimet kundër luftës nuk kërcënojnë sigurinë dhe rendin kushtetues të Serbisë.