Menaxheri i njohur i Zagrebit, Nikola Francetic, me vendim të Ministrisë së Punëve të Brendshme të Serbisë është urdhëruar që të largohet nga vendi për shkak se ai “paraqet rrezik sigurie”, transmeton Jutarnji list.
Ai ka jetuar në Beograd, ka punuar atje si drejtor i platformës televizive NetTV Plus, pjesë e United Group dhe së fundmi ka blerë një banesë… Deri para dhjetë ditësh, kur Ministria e Punëve të Brendshme e Serbisë e kishte urdhëruar të largohej nga vendi.
“Kam qenë shtatë vjet në Beograd, kam punuar, kam bërë miq dhe nuk kam pasur asnjë problem. Dhe më pas mora një telefonatë nga policia, Drejtoria për të Huaj” – i tha ai Jutarnjit.
Francetic është, në fakt, një nga të paktën 16 kroatët që janë dëbuar nga Serbia në muajt e fundit.
Kujtojmë se së fundmi Arien Stojanoviq Ivkoviq, mjeke kroate nga Beogradi, e cila pas 12 vitesh jetese në Serbi, presidenti Aleksandar Vuçiq vendosi ta dëbojë nga vendi dhe t’ia ndalojë hyrjen për një vit.
Ajo thotë se po kthehet në Kroaci me fëmijën e saj.
‘Dëbimi i një gruaje me fëmijë nga vendi për shkak të një postimi në Instagram nuk ka ndodhur kurrë më parë në Serbi. Unë dhe burri im po përpiqemi të organizojmë gjithçka. Avokati im po punon për çështjen. “Ky vendim nuk është aspak i ligjshëm”, tha Arien.
Ky vendim shkaktoi reagime në opinion, duke pasur parasysh integrimin e saj afatgjatë në shoqërinë serbe dhe lidhjet familjare në Serbi, shkruan gazeta express. Disa media thonë se arsyeja e përjashtimit është mbështetja e saj për protestat e studentëve, ndonëse nuk ka një konfirmim zyrtar për këtë.
