Dy personat e arrestuar në pikën kufitare në mes të Serbisë dhe Hungarisë-Horgosh nuk kanë qenë pjesëtarë të Ushtrisë Çlirimtare të Kosovës.
Kryetari i degës së veteranëve në Rahovec, Qemajl Krasniqi, ka deklaruar për RTKlive se personat e arrestuar në pikën kufitare mes Serbisë dhe Hungarisë në Horgosh nuk kanë qenë pjesëtarë të Ushtrisë Çlirimtare të Kosovës (UÇK) gjatë luftës.
Sipas tij, ata kanë qëndruar në Gjermani gjatë viteve të luftës dhe nuk kanë lidhje me konfliktin në Kosovë. Krasniqi e konsideron këtë rast si pjesë të një strategjie të Serbisë për të krijuar tensione dhe për të ushtruar presion ndaj shqiptarëve.
“Konfirmojmë në degën e veteranëve të Rahovecit se personat e arrestuar nuk janë në listën e veteranëve. Sipas konfirmimeve që kemi nga familjarët ata nuk kanë qenë në Kosovë, gjatë luftës kanë qëndruar në Gjermani dhe nuk kanë të bëjnë asgjë me luftën. Por, ne konsiderojmë se është në taktikat e njohura tashmë të Serbisë për të shkaktuar drama, tragjedi, fatkeqësi tek populli shqiptar dhe për të bërë një luftë speciale kundër Kosovës, në këtë rast duke pësuar qytetarët e pafajshëm të Kosovës. Ne ndjejmë keqardhje për ata njerëz atje, pavarësisht që nuk kanë qenë pjesëtarë të Ushtrisë Çlirimtare të Kosovës”, ka theksuar Krasniqi.
Ministria e Punëve të Jashtme e Serbisë ka njoftuar se personat me inicialet X.E dhe B.E dyshohen për krime lufte në Kosovë në vitin 1999, përfshirë një kidnapim në Rahovec. Megjithatë, nacionaliteti i tyre nuk është përmendur.
Ndërkaq, Ministria e Punëve të Jashtme të Kosovës nuk ka dhënë ende një reagim zyrtar për këtë çështje.
Në këtë kontekst, Ministria e Punëve të Jashtme dhe Diasporës ka paralajmëruar qytetarët që të shmangin kalimet tranzite përmes Serbisë, për shkak të rrezikut të arrestimeve arbitrare nga autoritetet serbe
