Procesi i dialogut të Brukselit, që u pat promovuar si rruga drejt normalizimit të marrëdhënieve mes Kosovës dhe Serbisë, tani, nga njohës të zhvillimeve diplomatike, po shihet si i padobishëm. Eksperti amerikan për Ballkanin, Daniel Serwer, ka thënë se dialogu më, praktikisht, nuk ekziston, teksa thekson se Perëndimi po tregohet më i ashpër ndaj Kosovës, sesa ndaj Serbisë.
Dialogu Kosovë–Serbi, i lehtësuar nga Bashkimi Evropian dhe i mbështetur nga Shtetet e Bashkuara të Amerikës, është shndërruar në një proces të mjegullt dhe jofunksional, ka theksuar njohësi amerikan i çështjeve diplomatike, Daniel Serwer.
Me gjithë deklaratat optimiste të dhëna së fundi nga zyrtarë evropianë, eksperti për Ballkanin Perëndimor ka thënë se dialogu veçse ka mbërritur në limitet e tij.
“Cili dialog Kosovë–Serbi? A ka pasur ndonjë të tillë në gjashtë muajt e fundit, apo, madje, në një vit? Apo gjatë disa viteve të fundit. Procesi i udhëhequr nga BE-ja duket se ka arritur kufijtë e vullnetit politik në Beograd dhe në Prishtinë, ku asnjëra prej tyre nuk duket e etur të vazhdojë më shumë, veçse të shtiren”, ka deklaruar ai.
Tek ka folur mbi rolin e Shteteve të Bashkuara në dinamizimin e procesit, Serweri ka theksuar se në këtë aspekt ka paqartësi, si dhe mungesë të interesit strategjik për përfshirje në mënyrë aktive.
“Nuk kam vënë re ndonjë interes strategjik të administratës së re të SHBA-së në Kosovë. As nuk shoh ndonjë shenjë se Washingtoni po ripërcakton përparësitë e rolit të vet në rajon, megjithëse duket se ka ftohje pak ndaj Beogradit. Qëllimi strategjik për SHBA-në duhet të jetë njohja e ndërsjellë dhe shkëmbimi i ambasadorëve në nivel të plotë. Pastaj, duhet të reduktojë mbi angazhimin dhe bashkëpunimin me Beogradin, derisa Serbia të lëvizë në atë drejtim”, ka thënë Serwer.
Refuzimi i vazhdueshëm i Serbisë për t’i nënshkruar apo zbatuar pikat kyç të Marrëveshjes së Ohrit, sipas Serwerit, është dëshmi për mungesën e vullnetit politik.
“BE-ja dhe SHBA-ja do të mund të ushtronin shumë më tepër presion ndaj Beogradit – për shembull, duke ia zbatuar të njëjtat sanksione që ia kanë vendosur Prishtinës. Por, dyshoj se do ta bëjnë këtë”, është shprehur Serwer.
Në mandatin e parë presidencial të Trumpit, SHBA-ja pati caktuar edhe një emisar të posaçëm për dialogun Kosovë-Serbi. Nën ndërmjetësimin e Richard Grenellit, më 4 shtator të 2020-ës, Kosova e Serbia patën nënshkruar marrëveshjen për normalizim ekonomik. Porse kjo marrëveshje, që përfshiu edhe njohjen e pavarësisë së Kosovës nga Izraeli, nuk është zbatuar plotësisht.
E takimet e deritashme në Bruksel janë zhvilluar kryesisht në nivel të kryenegociatorëve, teksa kanë munguar ato të nivelit të lartë politik.
Takimi i tillë i kryenegociatorëve u mbajt këtë javë, porse nuk prodhoi rezultate dhe nuk pati as diskutime trepalëshe.
