Ministria e Kulturës, Rinisë dhe Sportit njofton se shfaqja teatrore “Hotel Grand”, me autorë dhe interpretë Rebeka Qena dhe Armend Smajli, e realizuar në Barabar Center në Prishtinë, është përzgjedhur nga platforma rajonale SEEstage si një nga shfaqjet më të mira teatrore të vitit 2025 në Evropën Juglindore.
E vlerësuar për qasjen artistike dhe fuqinë emocionale, si dhe për trajtimin e thellë të marrëdhënieve njerëzore në kontekstin e luftës dhe kujtesës kolektive, shfaqja përfaqëson denjësisht krijimtarinë bashkëkohore teatrore nga Kosova në skenën ndërkombëtare.
Ky vlerësim nga SEEstage, platformë e njohur për kritikë teatrore dhe gazetari kulturore në rajon, dëshmon cilësinë, guximin artistik dhe potencialin ndërkombëtar të skenës teatrore kosovare.
MKRS, e cila ka mbështetur realizimin e kësaj shfaqjeje, ka uruar ekipin krijues për këtë sukses dhe rithekson përkushtimin e saj për të vazhduar mbështetjen e artit dhe kulturës që promovojnë Kosovën përtej kufijve të saj.
