Ligjvënësit sllovenë votuan të enjten për anulimin e një referendumi për ndërtimin e një centrali të ri bërthamor pasi grupet mjedisore dhe ekspertët paraqitën ankesa duke vënë në dyshim ligjshmërinë e tij në Gjykatën Kushtetuese të Sllovenisë.
Centrali i ri JEK 2 do të ndërtohej pranë termocentralit ekzistues bërthamor të Sllovenisë në Krsko, i cili është në pronësi të përbashkët të Sllovenisë dhe Kroacisë dhe plotëson rreth 20% të kërkesës për energji elektrike në Slloveni dhe 16% në Kroaci.
Gjashtëdhjetë e nëntë deputetë në parlamentin me 90 vende votuan për anulimin e referendumit publik, një ishte kundër dhe një abstenoi nga votimi. Referendumi do të mbahej më 24 nëntor.
Në fillim të këtij muaji, parlamenti i Sllovenisë vendosi të thërrasë referendumin me pyetjen: “A e mbështesni zbatimin e projektit JEK 2, i cili së bashku me burimet e tjera me karbon të ulët do të sigurojë një furnizim të qëndrueshëm me energji elektrike?”
Por kritika publike si për pyetjen ashtu edhe për projektin bëri që grupet parlamentare të tërhiqnin mbështetjen e tyre për referendumin, shkruan Reuters, transmeton kk.
