Sot janë bërë 26 vjet nga vrasja e dhjetëra shqiptarëve dhe dëbimi i mijëra të tjerëve nga veriu i Mitrovicës. Ministri në detyrë i Punëve të Brendshme, Xhelal Sveçla, tha se datat 3 dhe 4 shkurt nuk shënojnë vetëm tragjedi njerëzore, por edhe zbatimin e dhunshëm të një politike të ndryshimit të strukturës etnike në katër komunat veriore të vendit, përcjell KosovaPost.
“Ngjarjet e rënda të 3 dhe 4 shkurtit të vitit 2000 janë dëshmi e qartë e vazhdimësisë së planeve shtetërore famëkeqe të Serbisë për spastrimin etnik të shqiptarëve nga vendi dhe pronat e tyre. Në zbatim të këtij plani kriminal, 26 vite më parë u ekzekutuan 10 qytetarë tanë, mes tyre gra, burra dhe fëmijë, u plagosën 25 të tjerë, ndërsa brenda atij muaji rreth 12 mijë banorë u dëbuan me forcë nga pronat e tyre. I gjithë ky agresion u ushtrua vetëm për shkak të përkatësisë së tyre etnike shqiptare”, tha ai.
Sipas tij, datat 3 dhe 4 shkurt nuk shënojnë vetëm tragjedi njerëzore, por edhe zbatimin e dhunshëm të një politike të ndryshimit të strukturës etnike në katër komunat veriore të vendit. Përmes vrasjeve, frikësimit dhe dëbimeve masive, veriu i Republikës së Kosovës u shndërrua me forcë nga zona me shumicë shqiptare në zona me shumicë serbe.
“Këto krime janë të dokumentuara dhe përbëjnë thirrje të vazhdueshme për drejtësi. Dorasit e vrasjeve dhe krimeve duhet të dalin para drejtësisë dhe të mbajnë përgjegjësi për jetët e pafajshme të marra. Vetëm përmes kujtesës dhe drejtësisë sigurohemi që krime të tilla të mos përsëriten më kurrë. Si institucione të Republikës së Kosovës jemi angazhuar dhe nuk do të ndalemi në kthimin e të gjitha familjeve shqiptare të dëbuara në pronat e tyre dhe në garantimin e çdo të drejte të tyre. Koha kur Serbia ka maltretuar, vrarë, masakruar dhe dëbuar shqiptarë për aspirata territoriale ka marrë fund. Republika e Kosovës do të vazhdojë të kërkojë drejtësi për viktimat, të mbrojë integritetin e saj territorial dhe të kërkojë dorëzimin e të gjithë kriminelëve të luftës, në mënyrë që paqja, e vërteta dhe drejtësia të mbizotërojnë përgjithmonë”, ka shkruar ai në “Facebook’.
