Ministri në detyrë i Punëve të Brendshme, Xhelal Sveçla ka zhvilluar sot një takim me kryetarin e komunës së Zubin Potokut, Izmir Zeqiri.
Me anë të një postimi në Facebook, Sveçla bëri të ditur se është nënshkruar një marrëveshje e përbashkët që mundëson shërbime të reja për qytetarët, përcjell KosovaPost.
“Pas një takimi të frytshëm me Kryetarin e Komunës së Zubin Potokut Izmir Zeqiri, nënshkruam marrëveshjen e përbashkët përmes së cilës do të mundësojmë shërbime të reja e efikase për qytetarët tanë, personel shtesë dhe hapësira të mjaftueshme pune për ta, në kuadër të aneksit të objektit të Komunës së Zubin Potokut që tashmë i përket Ministrisë së Punëve të Brendshme”, ka shkruar Sveçla.
“E falënderoj Kryetarin z. Zeqiri për mbështetjen dhe bashkëpunimin e vazhdueshëm që të ofrojmë mundësi dhe shërbime në çdo kohë për të gjithë qytetarët tanë pa dallim”, shkroi Sveçla.
