Telekomi i Kosovës është obliguar që t’ia paguajë edhe mbi 5.7 milionë euro Dardafonit, pasi Gjykata Komerciale i ka refuzuar si të pabazuara ankesat e ndërmarrjes publike. Nga kjo e fundit kanë akuzuar sistemin gjyqësor për dështim në adresimin e drejtë të kontestit të saj me Dardafonin, derisa kanë paralajmëruar ankesë në shkallën e dytë. Mirëpo, nga Gjykata Komerciale kanë thënë se të gjitha vendimet e tyre janë të arsyetuara.
Telekomi i Kosovës nuk e ka ndërmend që t’ia paguajë mbi 5.7 milionë euro shtesë kompanisë “Dardafon”, pavarësisht asaj që Gjykata Komerciale ka vendosur në favor të kësaj kompanie.
Zyrtar të Telekomit thonë se është e treta herë që i njëjti gjyqtar vendos në favor të kësaj kompanie, edhe pse pretendimet i ka rrëzuar Gjykata Kushtetuese.
Feim Kelmendi, zyrtar Kryesor i Financave dhe Thesarit në Telekom thotë se nga ky vendim Telekomi do të dëmtohet financiarisht.
Ai thotë se Telekomi po bëhet gati që ta apelojë vendimin e komerciales.
RTK pyeti në Gjykatën Komerciale për akuzat e Telekomit që tha se “gjykatësi i njëjtë ka nxjerrë tri herë vendim të njëjtë”.
Zëdhënës për informim nga komercialja kanë thënë se çdo vendim i tyre është i arsyetuar.
“Gjykata nuk i komenton vendimet gjyqësore sa i përket mënyrës së vendosjes, gjyqtarët janë të pavarur në atë drejtim dhe secili vendos duke i respektuar parimet e pavarësisë dhe paanshmërisë, andaj Gjykata nuk komenton rreth vendimeve të tyre”, tha Albënora Bekteshi-Hoti zyrtare për Informim dhe Monitorim të Mediave.
Kompania Z-Mobile në vitin 2015 i ishte drejtuar arbitrazhit pasi kishte pretenduar se Telekomi i Kosovës po e shkelte marrëveshje, duke refuzuar t’i ndante numra shtesë si dhe të ofronte shërbime 3G dhe 4G Z-Mobile. Arbitrazhin e kishte fituar, por Gjykata Kushtetuese lëndën e kishte kthyer në rivendojse, pas ankesave të Telekomit.
