Agjencia e Ushqimit dhe Veterinarisë është duke pritur rezultatet e analizave për nivelin e prezencës së pesticideve mbi nivelet e lejuara në mandarinat e importuara nga Shqipëria.
Një gjë të tillë e ka bërë të ditur zëdhënësi i AUV-it, Lamir Thaçi në një lidhje direkte në emisionin “Mirëmengjesi Kosovë“ në RTK.
“Në momentin që janë ngritur dyshimet e bazuara nga mekanizmat e Bashkimit Evropian, ku për disa shtete janë ndaluar disa ngarkesa, por jo të gjitha, ne menjëherë kemi marrë masat e kontrollit. Nuk kemi ndërmarr veprime e as masë ndalese, por këto janë veprime që kërkohen konform ligjit për të vërtetuar dyshimin bazuar se a ekziston apo jo”, tha ai.
Ai ka thënë se tashmë kanë shtuar frekuencën e kontrollit, ku secila ngarkesë kontrollohet detajisht dhe për se cilën ngarkesë janë marrë mostrat pa marrë parasysh origjinën e mandarinave. “Ne dëshirojmë të mos jemi selektiv në kontrollë dhe të gjitha mostrat janë dërguar në laborator. Tani jemi duke e pritur rezultatin e tyre”, shtoi Thaqi.
Sipas tij koha kur do të dalin rezultatet e këtyre mostrave varet nga laboratori. “Ai është mekanizëm i pavarur dhe varet se çfarë metode përdorë dhe cili është kapaciteti”, tha ai.
Megjithatë, sipas Thaçit të gjitha mandarinat që janë aktualisht në treg janë të mirëkontrolluara nga inspektorët e AUV-it dhe qytetarët nuk duhet të janë të shqetësuar.
“Të gjitha ngarkesat kanë qenë të shoqëruara me komplet dokumentacionin që kërkohet sipas bazës ligjore që i nënshtrohet kontrollit kufitar dhe për këto ne nuk kemi pasur asnjë dyshim të ngritur rreth shëndetit të tyre”, përfundoi Thaçi.
