Agjencia Turke për Bashkëpunim dhe Koordinim (TIKA) ka rinovuar klinikën e brendshme të qendrës shëndetësore në kuadër të Organizatës Komunale të Pensionistëve dhe Invalidëve të Punës në Prizren, duke ofruar edhe mbështetje me pajisje, raporton Anadolu, transmeton KosovaPost.
Në ceremoninë e hapjes së rinovimit që u mbajt në ndërtesën e shoqatës morën pjesë nënkryetari i TIKA-s, Mahmut Çevik, zv/kryeministrja e Kosovës për Çështjet e Minoriteteve dhe të Drejtave të Njeriut, Emilija Rexhepi, ambasadori i Türkiyes në Prishtinë, Sabri Tunç Angılı, kryetari i Partisë Demokratike Turke të Kosovës (KDTP), njëherësh ministër i Zhvillimit Rajonal, Fikrim Damka, deputetja e KDTP-së, Fidan Brina Jılta, si dhe përfaqësues të institucioneve vendore dhe shoqatave të pensionistëve.
Në fjalën e tij në cremoni, Çevik njoftoi se kanë realizuar afro 1 mijë projekte në fusha të ndryshme dhe për komunitete të ndryshme që nga viti 2004, kur kanë filluar aktivitetet e tyre në Kosovë. Ai tha qendrën në fjalë e ka vizituar rreth 6 muaj më parë, duke premtuar mbështetjen e tyre për ofrimin e një shërbimi të tillë.
“Ne e konsiderojmë veten të lumtur që kemi kontribuar për miqtë dhe vëllezërit e vlefshëm pensionistë në këtë shërbim në fushën e shëndetësisë, duke zbatuar një projekt të tillë që të moshuarit tanë të kenë një jetë të shëndetshme”, tha Çevik.
Zv/kryeministrja Rexhepi në fjalën e saj theksoi se TIKA i jep Kosovës mbështetje miliona euroshe në fusha të ndryshme. Duke e cilësuar Türkiyen si “partner dhe vëlla të madh”, ajo theksoi se marrëdhëniet mes dy vendeve janë afatgjata.
Fjalë rasti mbajtën edhe ambasadori Angılı, ministri Damka, kryetari i komunës së Prizrenit, Shaqir Totaj dhe kryetari i Organizatës Komunale të Pensionistëve dhe Invalidëve të Punës, Jusuf Vraniqi, të cilët falënderuan TIKA-n për mbështetjen ndaj pensionistëve të Prizrenit.
Në kuadër të projektit të realizuar nga TIKA, klinika e brendshme e qendrës shëndetësore në kuadër të Organizatës Komunale të Pensionistëve dhe Invalidëve të Punës në Prizren është rinovuar dhe objektit i është ofruar mbështetje me pajisje.
