Nisma e Ministrit të Jashtëm të Maqedonisë së Veriut, Bujar Osmani, QUAD i Ballkanit Perëndimor- Maqedonia e Veriut, Shqipëria, Kosova dhe Mali i Zi, në Rusi është shpallë “anti-serbe” dhe si “presion ndaj Serbisë”.
“Ky është një komunitet pro NATO-n dhe kundër Rusisë”, shkruan agjencia ruse e regjimit Sputnik, transmeton Open TV. Russia Today, media e regjimit të Putinit e sheh iniciativën e Kryediplomatit shqiptar të Maqedonisë së Veriut si tentim për izolimin e Serbisë.
Për të njëjtën nismë shkruajnë edhe mediat serbe pro-Viçiqit: “Vendet e rajonit formuan një Ballkan të ri Perëndimor pa Serbinë! Plani u sajua në Shkup!”.
Nga ana tjetër, nisma e re u mirëprit nga themeluesit e saj, Ministri i Punëve të Jashtme të Maqedonisë së Veriut Bujar Osmani, Ministrja e Punëve të Jashtme dhe Evropiane të Shqipërisë Olta Xhaçka, Ministri i Jashtëm i Kosovës Kreshnik Ahmeti dhe këshilltari për politikë të jashtme i Kryeministri i Malit të Zi Gjorgje Raduloviç.
“Pas agresionit të Federatës Ruse ndaj Ukrainës, harmonizimi me Politikën e Përbashkët të Jashtme dhe të Sigurisë, por edhe më gjerë me pozitat dhe vlerat e botës demokratike, u kthye në një nga prioritetet më të rëndësishme të vendeve që aspirojnë anëtarësimin në BE, por edhe si mesazh i qartë se ku përkasin këto vende”, theksoi Ministri, Osmani në takimin e katërshes., duke shprehur kënaqësinë për themelimin e forumit joformal, të quajtur QUAD.
Kujtojmë se Shqipëria, Mali i Zi dhe Maqedonia e Veriut janë tashmë anëtarë të NATO-s dhe janë të gjithë kandidatë për anëtarësim në BE. Të katër vendet kanë vendosur sanksione ndaj Rusisë, ndërsa Serbia kundërshton anëtarësimin në NATO dhe refuzon të vendosë sanksione ndaj Rusisë, duke shkaktuar kështu pakënaqësi në Bruksel dhe duke ndalur praktikisht procesin e saj të mëtejshëm të negociatave.
