Presidenti i zgjedhur Donald Trump vazhdon të plotësojë kabinetin e tij me zyrtarë që e kanë mbështetur gjatë fushatës. Së fundmi, ai ka njoftuar emrat për dy pozita të rëndësishme: Sekretarin e Shtetit dhe Prokurorin e Përgjithshëm.
Siç ishte njoftuar më herët në media, Trump bëri me dije se ka emëruar senatorin republikan Marco Rubio për postin e Sekretarit të Shtetit. Në një deklaratë, Trump e përshkroi Rubio-n si një “avokat të fortë për kombin, një mik të vërtetë të aleatëve tanë dhe një luftëtar të patrembur që nuk do të tërhiqet kurrë ndaj kundërshtarëve”.
Rubio është nënkryetar i Komisionit të Senatit për Zbulimin dhe anëtar i Komisionit të Senatit për Marrëdhëniet me Jashtë. Ai njihet për qëndrimet e tij të forta ndaj Kinës, Kubës dhe Iranit dhe ka qenë një nga kandidatët që Trump po shqyrtonte për postin e nënpresidentit, përpara se të vendoste përfundimisht për senatorin J.D. Vance.
Po ashtu, Trump ka zgjedhur ligjvënësin e Floridës, Matt Gaetz, për të shërbyer si Prokuror i Përgjithshëm, një nominim që pritet të shkaktojë debate dhe të kalojë nëpër një proces miratimi në Senat.
Në një tjetër emërim, Tulsi Gabbard, ish-anëtare demokrate e Kongresit dhe kandidate për presidente, u përzgjodh për të shërbyer në postin e Drejtoreshës së Zbulimit Kombëtar.
Edhe pse kabineti i Trump-it nuk është plotësuar ende, ai ka bërë emërimet kryesore në ditët pas zgjedhjeve. Megjithatë, ende mbeten shumë pozita të rëndësishme pa emërime, shkruan euronews.al. Duket se presidenti i zgjedhur Trump po e plotëson kabinetin e tij në një ritëm të shpejtë, duke zbardhur të gjitha emrat që do të mbajnë postet kryesore gjatë mandatit të tij katërvjeçar.
